The(G)Forum

Kamui Ninja S01E01 : 9/10
https://www.youtube.com/watch?v=Sjs6MkX9ASU

oh cool. grad mal notiere. thx!

True Detective S04 : 8/10

Grad letscht Woche Staffle 1 vo True Detective s erscht Mal gseh. Sie isch nöd im eigentliche Sinn spannend, underhaltsam oder automatisch absorbierend aber dä Cohle Character treiht alles, er git em ganze es exischtenziells Gwicht, wo unsäglich bannend isch. Keis Wort, woner gseiht hät, isch mier fremd gsi, Sätz, woner erwähnt hät, han ich unabhängig, fascht Wort für Wort au scho erwähnt. Ich lieb dä Charakter. Alles, woner seiht, isch so tüüfschürfend und kompromisslos und wahr. Einzig mit däm, was er am Schluss seiht, bini nöd iiverstand, wills nöd konsequänt isch.

Dä Marty meint, dDunkelheit häg offesichtlich sgrössere Teritorium, wämme in Sternehimmel luegt, woruuf dä Cohle antwortet, dass in Ahnbetracht, dass ahfänglich alles Dunkelheit gsi isch und sLiecht sich ahfah hät überhaupt behaupte, sLiecht doch am siege säg.
Was er hät sölle säge und was integer mit em Chrakter gsi wär: Au wänn sLiecht günni, isch es dä Priis wert? Das hät er sölle säge oder fröge, das wär dä perfäkt Abschluss gsi.

searching uf netflix: 8/10
dä ganz film luegsch uf en bildschirm. d'story isch spannend. beidruckend, was da drus gmacht händ.

Aliens (9.8/10)

In HDR 4K. Bildqualitet, vor allem gegeüber dene verwäschene und unscharfe HD Versione woni einscht gha han, isch de Hammer. E wahri Freud!

The Sheep hat geschrieben: ↑01 Mär 2024 21:37 Aliens (9.8/10)

In HDR 4K

Stream nimi ah? D UHD Schibe chunnt ja gli…

abyss hat geschrieben: ↑02 Mär 2024 08:25 Stream nimi ah? D UHD Schibe chunnt ja gli…

ab Harddisk. Quelle isch wohrschinlich en Streaming Abieter gseh. Isch ämel mit WEB-DL agschriebe gseh. Aber mit 25GB no e gueti Grössi für en WEB Download

The Old Oak (7.5/10)

Schöns britischs Refugees welcome Märli vom Whisky Kultfilm Regisseur Ken Loach (Angel's Share)

Innamorato pazzo (7.5/10)

Ebefalls es Märli. Dasmol das vom arme Busfahrer wo sich unstärblich ine richi Prinzässin verliebt, und glaubt dass alles möglich isch, wemers nur gnüegend will. En typische Adriano Celentano Film us de 80er. "Gib dem Affen Zucker" heter damals uf dütsch gheisse. Ornella Muti mit 26

Summer School (7/10)

Highschool Komödie vo 1987, woni vor allem wäge explizite Gore Effekt in Erinnerig gha han. Immerno witzig und unterhaltsam.

Platoon (8/10)

In 4K UHD HDR gluegt. Qualitet schwankt vo Szene zu Szene und erreicht nur sälte d'Schärfi womer vo 4K erwartet. Zitewis hanis Gfühl gha, ich lueg e schlächti DVD. Farblich hets do scho es bitz besser usgseh.

The Sheep hat geschrieben: ↑02 Mär 2024 23:08
Summer School (7/10)

Highschool Komödie vo 1987, woni vor allem wäge explizite Gore Effekt in Erinnerig gha han. Immerno witzig und unterhaltsam.

So guet dass dä Film süsch no öper kennt und schätzt. Film meiner Kindheit, dä Film isch schuld dass ig gern Horror- und Splatterfilm luege.

Doraemon hat geschrieben: ↑08 Mär 2024 09:40So guet dass dä Film süsch no öper kennt und schätzt. Film meiner Kindheit, dä Film isch schuld dass ig gern Horror- und Splatterfilm luege.

ich bin glaubs zuefellig über Summer School gstolperert damals. Wohrschinlich eifach ime Videoverleih usglehnt und kopiert. Chann mi nüm genau erinnere. Jedefalls bini zu däm Zitpunkt bereits voll im Splatterfieber gseh. Weni zruckdänk gits glaubs 3 Momänt wo schuld sind dassi es zitli lang regelrecht Horror und Splatterfim besaässe worde bin: 1. Fründe in der Pfadigruppe wo am Lagerfüür vo "Zombies unter Kannibale verzellt händ, 2. "Rückkehr der Zombies" Poschter vom Kino Atelier in der Freyestross zBasel, und 3. mi erschti eigeni Erfahrig: "Die Geisterstadt der Zombies" im Doppelprogramm ame Sunntig Nomittag im Kino Roxy in Birsfälde. Das isch für mi d'Offebarig gseh. So öppis hetmer damals im TV definitiv nit chönne gseh

9.5 /10 scheisse geil. Typisch Guy Ritchie und immer wieder huere geili Twists und unvorhersehbars. Leider i 2 Täg scho alles glueged.


Quelle

The Sheep hat geschrieben: ↑08 Mär 2024 20:47

Doraemon hat geschrieben: ↑08 Mär 2024 09:40So guet dass dä Film süsch no öper kennt und schätzt. Film meiner Kindheit, dä Film isch schuld dass ig gern Horror- und Splatterfilm luege.

ich bin glaubs zuefellig über Summer School gstolperert damals. Wohrschinlich eifach ime Videoverleih usglehnt und kopiert. Chann mi nüm genau erinnere. Jedefalls bini zu däm Zitpunkt bereits voll im Splatterfieber gseh. Weni zruckdänk gits glaubs 3 Momänt wo schuld sind dassi es zitli lang regelrecht Horror und Splatterfim besaässe worde bin: 1. Fründe in der Pfadigruppe wo am Lagerfüür vo "Zombies unter Kannibale verzellt händ, 2. "Rückkehr der Zombies" Poschter vom Kino Atelier in der Freyestross zBasel, und 3. mi erschti eigeni Erfahrig: "Die Geisterstadt der Zombies" im Doppelprogramm ame Sunntig Nomittag im Kino Roxy in Birsfälde. Das isch für mi d'Offebarig gseh. So öppis hetmer damals im TV definitiv nit chönne gseh

Mis Grosi isch denn immer ga VHS hole ir Videothek für üs Goofe und se kopiert und sie het es super Händli gha und dank ihre hani hüt so ne "guete" Filmgschmack. Spencer/Hill, Shaw. Bros. Filme, Ninja-Action (mit R. Harrison, aber o Kracher wie Ninja-Kommando), Space-Animes, HK-Komödie wie Ente gut...etc. Drunder isch äbe o mau der Summer School gsi und mir hei dä ufe und abe gluegt und sogar die legendäri Szene für üser Eltere nachegspielt hüt würd me äuä Goofe wo so öpis mache grad id Psychi stecke.

Damsel. 2/10


Billige fantasy zueg mit de millie brown. De drache isch no halbwegs das bescht am film.

Succession
Die ganz Serie -> 6/10
Einzelni Episodene -> absolut total 10/10

Has afoh luege will jehnsti Artikel d Serie hei afoh hype ("eine der höchstgelobten und meistausgezeichneten Serien der Fernsehgeschichte"), und chas nid wüklich nachvollzieh. Sie het ihri sehr starke Momente (S02E10, S04E03, S04E08, S04E10), aber halt au sehr viel vom gliiche. I der Familie kämpft jede gege jede und alli beleidige sich gegesiitig, und es git au Lüt wo ganz sicher i keim Team wotsch ha. Der Greg isch e unglaublich hibbelige Stressbueb, und der Tom Wamsgams e unglaublichi Tröte. Was für e desorientierte Looser und Marionette. Het kei Ahnig was um ihn ume passiert, drum isch wohl der Greg si Sidekick.

Aber nebst dene Sache spielt halt jede sini Rolle und zeigt was in ere dysfunktionale Familie alles schief lauft. Me tritt sich vor allem gegenseitig uf d Füess, aber eigentlich sis verwöhnti Kiddies und alli hei gnue Geld und müesse überhaupt nüt mache. Und wenn sie doch öppis mache denn eifach us Spass a der Freud und nid will sie würklich müesste. Und so isch d Serie halt vor sich hin plätscheret, ohni dass gross öppis passiert. Schad.

Und me frogt sich eigentlich nur, wieso es paar desinteressierti Volldeppe so viel ds säge hei im ene gigantische und weltumspannende Mediekonzern wo so ziemlich alles wichtige kontrolliert.

guet zämegfasst

Poor Things

ha scho lang nüm sone abgdrehte Film gseh! Und Emma Stone gitt würkli alles keis Wunder, hett sie en Oscar becho für die Rolle. Isch mer bitz vorcho wie Alice im Wunderland mit eme Frankenstein-Ischlag. Cinematografie isch jensiits, richtig erfrischend und einzigartig. Und erstuunlich viel Sex-Szene mit ere komplett nackte Emma

8/10

Dune 2

im IMAX in Spreiti go luege am Weekend. Super Film, läck Bobby die Szene uf dem Big Screen mit dem Sound und de rüttelnde Sitz, hammer!

9/10

Madame Web : 1/10 (1 punkt für de teenies)

Master(G) hat geschrieben: ↑18 Mär 2024 10:23 Dune 2

im IMAX in Spreiti go luege am Weekend. Super Film, läck Bobby die Szene uf dem Big Screen mit dem Sound und de rüttelnde Sitz, hammer!

9/10

dä isch mega!

Dune 2

Find dä Film scho guet aber irgendwie würkt er au bitz fragmentiert, währenddem dä erscht wie uus eim Guss würkt und in sich koheränter isch, defür aber bitz langatmiger und inhaltsärmer (aber irgendwie stimmigsvoller).
Bim zweite sind dSchnitt bitz abprupt und me merkt irgendwie, dass bitz Müeh gha händ alles in en Kinofilm zpacke. Me isch schnäll absorbiert vom Film, nur zum duur en plötzliche Szenewächsel wieder uufgweckt zwerde und das hin und her wiederhollt sich durchgehend. Visuell natürli überwältigend guet, nur dWüeschtemuus händs würkli chönne besser mache. Die letscht Schlacht scho huere episch.

Master(G) hat geschrieben: ↑18 Mär 2024 10:22 Poor Things

Ich bin eigentlich zimlich Fan vom Yorgos Lanthimos sine Film. Dogtooth, The Killing of a Sacred Deer, The Favourite, und natürlich The Lobster. Alles hervorragend schrägi Film. Aber mit Poor Things bini nit warm worde. Das ischmer eifach abstossend und zu chaotisch inecho. Villicht hets aber au grad voder Stimmig nit passt bi mir und i versuechs irgendwenn namol. Mol luege.

Grad mal die erste 3 Episode vo Sand Land gluegt. Akira Toriyama (rip)... als Vorbereitig ufs Game im April.
Nonig so warm worde demit, aber de Style gfallt mer halt. Viel Parallelä zu Dragonball findi. Grad de Beelzebub isch eigentlich en rosa Goku.
8 Episode sind jetzt uf Disney+/HULU


Quelle

sGame Demo hani eigentlich no guet gfunde. Gseht eigentlich genau so uus wie die Serie. Villicht sogar die gliich Grafik-Engine