Häckintosh

[Acid]

Hed öper erfahrigä mit Hackintoshs?

Ich mues langsam mol en neuä Computer heräschaffä. De IMac woni han isch vom 2009, s MBP vom 2010i und sowieso wahrschindlich jedä Momänt Tod (chum meh zu was bruchä wo meh als surfä isch... also meh no am vor sich hi vegetiere). Und im Grundgno wirdi dur s nit Vorhandä sii vomene aständigä Computer scho lang dra ghinderet, mol chli meh wiä eifach grad s nötigscht z machä, i de Regel wenn öper andersch öpis bruucht.

Ich bruuchen näb all denä Sachä womer sowieso so macht miteme Computer hauptsächlich für Bild und Videobearbeitig.

Diä einzig vernünftig Variantä für mich wär eigentlich en Mac Pro, und diä zwüsched vernunft und Wahnsinn, willmer jo no chli a d Zuekunft will dänkä, unds einäwäg viel Gäld isch, wär denn nid diä billigscht sondern diä zweit "standard Variantä"... nur ischs denn ebä doch plötzlich wieder uhuren viel Cholä. Aber nach den Jahren des leidens hetti gern öpis wo eifach lauft, undmi nid ständig a allnä Eggä und Ändä usbrämst.

Mer lisst und ghört i letschter Zit so einiges vo Hackintoschs, und drum hani mol überleit öb das e Variantä wär... allerdings ghörtmer eigentlich vor allem vo Computer freaks, wo säged sig alles super, alles eifach und geil, und denn irgendwelchi Sachä schnurred vo dem ich nüt verstand.

Ich han chli Schiss, dassi nochher meh demit beschäftigt bin mich drum z kümmere dass d Maschinä lauft, was natürlich au nid s Ziel isch, wemer en neuä Computer will zum richtig schaffä z chönä. Weniger Gäld zahlä für meh Power isch geil, aber natürlich auch numä wener nochher au funktioniert.


Hed öper au en Hackintosh gmacht do inn? Weiss öper öbs würklich so eifsch isch und guet lauft, oder öb das nur öpis für Lüt isch wo sich defür fasziniered und Freud am Baschtlä und Problem händ?


Gang ich richtig i de Ahnam, dass das diä richtig Sitä defür wär: http://www.tonymacx86.com" onclick="window.open(this.href);return false; ?
Und d Prozis bi fascht allnä Builds woni find, und au im Buyersguide bi dem macx86 sind alles i5 oder i7, höchschtens 4-chern. Das isch jo eigentlich au was i de MBPs und Imacs drin isch...

[Uriel]

Was isch am MBP vo 2010 schlecht? ich benutzt das als mis Hauptgräät täglich.
Was dr filicht am meischte nützt isches, e SSD iidsbaue. Hani vor em ne Jahr gmacht und ich will nie me was anderes.
en Mac Pro isch für Lüüt, wo nüd professionell müend Videos schniide etc. en reine wahnsinn.

[Acid]

Es isch am abliggä. Es isch uf verschiedeni Art und Wiis verbrucht, kabut, malträtiert, beschädigt. Do gits nüm viel z rettä, ich bins jetzt scho siteme rächtä Zitli eifach no am fertig Bruuchä, sit Afang Summer allerdings mit immer meh mühä, wills nid nur chli spinnt, und d Tatstatur kabut isch, sondern au tatsächlich Rächäintensivi Sachä eigentlich am liebschte überhaupt nüm will machä.

Aber au wos nonig so kabutt gsi isch, isch d Bearbeitig vo echli grössere Bilddateiä oder gar s rendere vo Video teilwies es rächts Geduld Spieli gsi. En SDD hani niä dinä gha, weiss aber au nid wiä sehr sich das würd uswürkä uf diä Prozess (guet, wenns denn chli intesniver wird, und mues ufd Plattä zrugg schriibä, ischs denn natürlich scho was anders).

Tuesch denn du au Video schniidä druf oder anderi Sachä wo d Hardware intensiv bruuched?

Ich hanmer zerscht scho au überleit eifach es aktuells MBP zchaufä. De Computertyp hed aber gfundä so viel Unterschied gspürimer wohl nid zumene 2010 MBP. Was zumindescht mit Blick uf de Prozi und au uf d Grafik eigentlich no e nohvollziäbari Ussag isch. Und wennmer de schnällscht Prozessor nimmt, choschtets halt au 3000.- Stutz, was au nüm viel weniger isch als de chlinscht Mac Pro. Klar, isch natürlich insofern nid verglichbar will s eint en Laptop isch, aber glich.

[Gurgelhals]

Wänn's en Desktop sött si werum dänn kein Mac mini? Guet, s'Problem bi dem isch, dass Apple die Grät sitt zwei Jahr(!) nüme updatet hätt, drum würd ich da jetzt sicher kein neue meh chaufe. Aber grundsätzlich sind die Dinger als Allzweck-Rechner meh als gnueg guet. Aber ebe: Produkt-Update abwarte.

Es tuet sich halt grundsätzlich hardwaremässig nüme viel i de letschte Jahr bi de Desktop- und Laptop-Hardware. Intel isch sitt ere gfühlte Ewigkeit i de Warteschlaufe und bi de Grafikchips hanget's uf em 28nm-Prozess fescht. Entsprächend falled au d'Performancegwünn bi eme Neugrät ehner bescheide us. Aber deswäge grad zu eme Mac Pro griife, isch tatsächlich Wahnsinn. Umgekehrt isch es ja inzwüsche au eifach so: Usserhalb vo Spieli isch für Standard-Awändige d'Hardware vo de letschte 4-6 Jahr i 99.9% schlicht und eifach gnueg guet. SSDs sind da tatsächlich meh oder weniger die einzig Neuerig vo de letschte Jahr gsi, wo i dem Bereich würklich e spürbari Verbesserig bracht händ.

[Acid]

En Mac Mini hani grad für s Theater kauft. Han gwartet sitem Früehlig, aber jetzt hani halt eifach ein müese Chaufä. Aber ebä, det gots um en Computer wo bitz dies bitz das mues chönä, hauptsächlich aber au Media Player isch, und für das langts denn no lang. Und schlussendlich ebä, wäg de lahmä Witerentwicklig, gots villicht no chli, oder denn wird de Unterschied au nid gross sii.

Mir isch au klar dasses für hin und wieder im IMovie es paar Schnipsel zämähänkä oder im IPhoto (oder wiä denn s neuä heisst) es jpeg zrächtschniidä oder en Filter drüberzleggä kein MacPro brucht, und en Mac Mini für das wunderbar funktioniert, und für vieles andere au.
Ich suech aber ebä nid en Allzweck Rechner, und wahrschindlich sind mini Sachä halt au kei Standard Awändigä. Es god mir drum 4K Video einigermassä aständig chönä z schniidä und z bearbeitä, und bi de Bildbearbeitig bruchi bis jetzt i erschter Linie Lightroom und Photoshop, und au wenns i de Regel eher so bi 100MB lieht, chan es Bild au mol es Giga sii.

Im Lightroom würdmer en SSD sicher au sho guet tuä, und wenns nur um d Bildbearbeitig gängt, würdi wohl eifach es neus MBP neh, will au wenns agnehmer sii chönt, god eigentlich s meischt nid schlächt (teilwies aber ebä scho chli z viel Warterei...). Bim Video bini do aber ebä nid so zueversichtlich, do isch mis jetzigä MBP au bi HD Material in FCPX regelmässig a d Gränzä und drüber uus cho, und d Zitä wo alles benötigt isch teilwies nervzermürbend. Mol en ordentlichi 4K Datei in Photoshop mit Camera Raw welä z gradä hätti gar nid erscht müese probiere. Ich han au eifach de farkling Beach Ball satt.

[Uriel]

Ok. 4K Videos sind natürlich was anderes. Denn würd ich au langsam richtig Mac Pro schiele.

[Gurgelhals]

Wahr.

Näbedbi bemerkt isch es aber trotzdem tumm, dass Apple sich partout weigeret, en Semipro/Power User-Desktop irgendwo zwüschet Mac mini und Mac Pro im Sortiment z'füehre. Nöd jede chli aspruchsvolleri Awänder brucht grad en Xeon, ECC-RAM und e Workstation-Grafikcharte

[Acid]

Ja, sie händ wahrschindlich dänkt de IMac deckt de Bereich ab. Händ jo jetzt sogar au no en billigere gmacht, statt de MacMini z erneuere.

S Problem isch eifach dass de au nüm viel billiger isch, wemer de schnälli will, und dassmer für es Display zahlt wo zwar so schlächt nid isch, aber mer für alles was irgendwiä mit Bilder ztuä hed numä chan bruchä wemer nid meh oder weniger im Dunklä hockt. Für mich gits so einä glaub niä meh.

Ja und ein ohni Bildschirm wär natürlich glich au guet...



Ok... denn tönt das echli als müesti nid über Hackintosh nohdänkä wensmer i erschter Liniä wichtig isch dasses funktioniert. Wenn ihr do nüt chönd sägä ischs für mich erscht rächt nüt.

Denn müsstmi glaub nur no entscheidä was für en MP.

[Xinobrax2]

Dummi Frag aber...warum mueses e Mac si? D Adobe Tools laufed au uf Windows tiptop und d Hardware chentsch genau dine Bedürfniss apasse.

[Acid]

Hed verschiedeni Gründ. De wichtigscht, näb de Gwohnheit was halt scho au en sehr wichtigä isch, isch dasses halt doch no rächt viel Software gid, wo uf Windows nid lauft grad i dem Bereich (ich weiss, gid au viel für Windows wos nid für Mac gid, aber diä känni halt nid löl). Für mich s wichtigscht Final Cut und Motion. Wird immer besser und hedmi 300.- und 50.- kostet (bzw. 20% weniger oder so zum Gnau sii, will mer cha jo Apple Store Guethabä oft mit Rabatt chaufä). Vo Adobe hani nur Lightroom und Photoshop, und au det schili immer mol wieder chli nach Alternativä umänand. Und Finanziell gseh hätti de Unterschied denn au schnell wieder usgeh, wenni diä ganz CC müsst zahlä.

[Xinobrax2]

Tüür isch s CC uf jede Fall...und ich bin idR au nid eine, wo Windows empfilt XD Aber ebe, s wär e Alternative. De Vorteil bi de CC isch halt, dass alli Tools unterenand kompatibel sind. Das findi für de Workflow amigs na zimlich praktisch. De Priis für d Software chentsch ev. sogar mit de gsparte Hardwarechöschte wider inehole. Aber wie au immer, Gwohnheit spillt halt scho au e Rolle...

[Shadow]

MBP würdi zieh... finde das super. erstuunlich für mich, da ich nie so dä mac-fan gsi bin, jetzt hani aber sitteme jahr en mba und jetzt en mbp und

[TypeJ]

du? lol, ha gmeint dini frau und du findsches zwar lässig aber benutzisches nie?
und etz hesch en na en pro kauft?