ALCOM - Game Over

[Master(G)]

es isch scho mega schad, dass all die chline spezialischte-shops langsam usstärbed.
das "persönliche" isch, was ich härt vermisse ide hüttige ziit. aber mit dem macht mer halt kei chole und ziit isch hütt euses grösste guet.
aber ich muess mich au selber ade nase näh, bstell ich doch au viel online......

ich wünsch em alcom uf jede fall au alles gueti und dass ers no lang chan durezieh.
priise müesstet eifach besser si. wemmer ime digitec en bessere pc bechunt für weniger gäld, isch das es ernsthafts problem. zumal d'lüüt au je länger je meh weniger chole händ. zumindescht im moment grad.

[sidusson]

i stune eifach das so grossi läde wie alcom mit games weni geld mache aber retro shops momentan überall usem bode spriesse u chohle mache u chöi überläbe Retro = meh besser äuä vor Marge dänki..

[Buccaneer]

retro wennd halt viel no als "grümpel" ha. neui games ladet sich doch immer meh lüt abe. Mir sind z fuul zum ufstah und n cd wächsle. alles ditigal...

[Master(G)]

scho so. retro games chasch für en pappestil vo lüüt abchaufe, wo kei ahnig händ. wos ime estrich obe verstaubt isch über jahre.
und denn mit viel marge vertschute.

d'marge uf physische games isch extrem chli. teils chum en 5 liiber...

und ja, digital isch on the rise. hilft de situation au ned. gitts ned mal meh occassione bald.

[Avenger]

Schad geits jetz i die Richtig.

Ha ewig lang immer Games bim alcom bestellt, sit Mitti 90er-Jahre. Ds erst Mol gseh han i der Andy damals a der Goto, ere Computerbörse ds Züri im Kongresshuus.

Muess aber au säge dass ig seit Ende vo de 2000er viel weniger Stuff kauft ha. Nid bim Alcom, aber allgemein. Irgendwenn hesch halt eifach nüm so viel Ziit. Der Alcom gits sit viele Jahrzehnte, und het i dere Zit scho es paar Verändgerige düregmacht: Videogames, Retro, Import-Spiel, Filmverleih, Lego, Merchandise... Ich wünsch em Team uf jede Fall alles Guete und dass es sie au no es paar Johr länger wird geh.

[agestuffer]

ICh wett no sehr gärn wüsse wommer Games füren Papestiil vo Lüüt chan abchaufe.. Chum Master G - sägmer wo. Hani leider scho xxx Jahr nümme erläbt... Es ghit nur no ganz ganz wenig wo nid wüssed das das Zeugs hüt was wärt hett. ALso 100 NES Game für en 100ter oder so muesch also nid welle.. Haha...

Und viiili vo dene Retro Lädä mached das eher näbäbii. Full Time Retro Shop ghits ja nid soo huerä viil. Viili machted nur Online, nur Halbtags offe oder nur wenig Täg im Monet... Näbebii no en andere Job!!

Gruss agestuffer

[sidusson]

Classicgamestore, bitgames, gameparadis, da dr basler besonders oder paradeiss wie o immer er heisst. Disc ausverkauf usw

Die hei aui e physische lade u maches 100% u anschinend chöme si düre...

Isch auso scho nid gad nume 1-2 läde.. u da si nume die woni gad kenne

[agestuffer]

Klar, die känni alli au..Classic Gamestore macht au nur all Monet glaub 1 x uuf. Bitgames hett glaubs au kei Lade... Gameparadise cho
de Disc Ausverkauf hett au en Shop - bin mal vor 3 Jahr dettä gsii... Klar, es schiints zfunktioniere... Und es funktoiniert will sie sich spezialisiert hend... Games only.. Und das macht de ALCOM jetzt au.. Es isch schwierig mit wenige Lüüt es sones grosses Sotriment pflege und alles mit Härzbluet mache..

[Jones]

Und viiili vo dene Retro Lädä mached das eher näbäbii. Full Time Retro Shop ghits ja nid soo huerä viil. Viili machted nur Online, nur Halbtags offe oder nur wenig Täg im Monet... Näbebii no en andere Job!!

Das isch haargenau mi gedanke gsi...
Meh cha doch läde wie alcom nid mit eim vergliche wo das näbebii paarmal im monet macht ohni agstellti...

[agestuffer]

Die meischte vo dene Retro Shops sind 1 Man Show.... Wie gseit, meh Hobby als Full-Time-Job.... Keine hett 500m2, 6 Täg ide Wuche offe, Online Shop und Lade, 5+ Mitarbeiter und es sones grosses Sortimänts zum Pflege..... Viili devo wohol nid mal MWST Pflichtig und buchhaltig macheds au keini
(bin jetzt bitz bös, aber isch doch sooo)
Will da au nid schlächt rede, ich würds genau gliich mache. Ziit vode chline Lädä isch wohl eifach verbii.... Who's next.. De Softridge?

[Master(G)]

ja da hesch scho rächt...

[DeftOne]

Naja, meh als 1 Man show lohnt sich ja au nöd würkli. Was will mer hützutags au no n Lade 6 täg i de Wuche offe ha be dene Mietene wo ein da chostet. Da investier i denn doch lieber i bruchbari Lagerrüm zum e grosses Sortiment überhaupt lagere z chönne. Und bem Rest ischs halt so, wenn mers nöd mue, denn mue mers halt nöd. I gib ja sit i überhaupt mit all dem gstartet ha immer alles korrekt a.
Letschtendlich find ichs für n Shop mittlerwili besser, wemmer eifach e guets sortierts Lager het, n Lade selber chunt ein eifach ztüür.

Und joa bezüglich Alcom selber, ischs mer relativ egal. Da i sitm Launch vo Assassins Creed 1 primär be WoG bstell, bi döt eifach besser klar cho als mit Alcom, was au dra lit, dass d WoG siite optisch und organisatorisch düütlich agnehmer ufbaut isch als Alcom. Und falls es mal vorchunt, dass WoG was usverchauft isch, bstell i halt be cede.ch, wo ja au nöd ganz schlecht ufgstellt sind im Games-Bereich mittlerwili.

[thaeye]

han scho lang am alcom mal gseit vor ca. 10 jahr ihr muend unbedingt die homepage mal nöd "inhouse" mache sondern mal chli meh uf UX/UI luege. da wird hinedure typisch IT-ler es super backend entwicklet aber s frontend isch zum chotze.

[LuiStyle]

Who's next.. De Softridge?

Softridge, Wog. Alli wo no en lade händ. Nur die ganz grosse werdet überläbe Digitec und Interdiscount (Microspot).

Das isch mis gfühl, isch schad aber chasch ja nöd würkli ufhalte.

[rebornkid]

Who's next.. De Softridge?

Softridge, Wog. Alli wo no en lade händ. Nur die ganz grosse werdet überläbe Digitec und Interdiscount (Microspot).

Das isch mis gfühl, isch schad aber chasch ja nöd würkli ufhalte.

Denke de WOG het gueti Chance, isch da im Aargau guet verwurzlet. Und er het es super Konzept mit Games, Lego, Tradingcards, Merch, etc. Und de Onlineshop und sApp sind top. Chaufe sit Jahre min Stuff nur no det.
De Lade hends i de letste Jahre inmer chöne meh vergrössere und er würkt iladend. Sorry, aber bim Softridge im HB wotsch gar nöd ine, so was vo ungmüetlich.

[Retrogameworld]

Ich liebte alcom. Die Flyer im Briefkasten, telefonische Bestellung, einfach top war das, noch vor der Internet-Zeit quasi.

Leider werden die Preise aber u.a. nebst digitec / brack / galaxus etc auch von wog und alcom gedrückt (regelrechter Wettlauf, wer noch ein „50gi“ günstiger ist, denke ich manchmal).

79.- oder 89.- Franken für ein neues Game wäre auch völlig in Ordnung, bei dieser Qualität von heute. Aber der Markt besteht aus Eigenbrödlern (genau diese, die jetzt eingehen, haben auch Einfluss auf ihr Aussterben). Und sicher auch die Einstellung der Kunden.

Wenn ich überlege, dass ich in den 90ern 129.- Franken (oder mehr!) für ein SNES Game bezahlt habe… der Franken war zudem noch „stärker“. Da sind wir heute (zu) verwöhnt.

Wer hat nicht Freude an einem neuen Switch- oder PS5 Game zum Startpreis vom 54.90? Logisch. Aber dann muss man sich nicht verwundern, weshalb alles zu Boden geht.

Man müsste solche Shops ganz bewusst auch berücksichtigen, wenn sie die Games mit 79.- oder 84.90 anschreiben als Beispiel. So könnte man den physischen Laden und den persönlichen Kontakt rechtfertigen. Aber das geht aufs Portemonnaie und tut „weh“.

Retro funktioniert sicher auch wegen der besseren Margen, aber primär auch wegen des Fachwissens der Händler. Sonst kauft man nur „Brunz“ ein und es geht abwärts.

Generell beobachte ich, wie die Gesellschaft egoistischer und verlogener wird leider. Doppelmoral und Missgunst an vielen Ecken und Enden. Es geht uns generell zu gut in der heutigen Gesellschaft. Wie im alten Rom, wird das seine Folgen haben und das „Spiel“ beginnt von vorne.

Also: Geniessen, was es noch zu geniessen gibt. Aufhalten können wir es nicht. Aber unsere Haltung überdenken würde beim einen oder anderen durchaus Sinn machen.

Einen Laden (ob neu oder Retro) zu unterstützen, bedeutet auch, dort den „angemessenen“ Preis zu bezahlen und treu zu bleiben, auch wenn der Konkurrent einmal günstiger ist.

Von einem „Miteinander“ sind viele Branchen schon längst abgedriftet.

[thaeye]

es "miteinander" gits inere Marktwirtschaft nöd, de best gwünnt und de rest verteilt de reste. den chunt na de technologisch distributionskanal dezue wo s gschäft für brick und mortar halt doch sehr schwierig mache. jetzt das alles ufd "gsellschaft" welle schiebe, das sie nöd bereit isch "gnueg" z zahle isch chli schwach.

das als konsument vo villne au verarscht wirsch, stört dich den nöd. (wie z.b s wiitegeh vo de isparnis vo de digitale distrubution vo games, keis herstelle vo cases meh, kei aleitige, verteile ad retailer etc. )

chli romantisch underwegs du