Xinobrax2 hat geschrieben:Aber selbscht wenn e Serie nid psunders erfolgrich isch, sind d Verlust doch berechebarer, wenn d Serie vervollständigt wird. Wie gseit, s ganze Casting und s Erstelle vo de Requisite isch ja denn bereits erledigt. Di einzige Chöschte wo stiged sind d Gage vo de Beteiligte. E abgschlosseni Serie lat sich doch au in Zuelunft besser ad Sender und als DVD/Bluray verchaufe. Also was isch los in Hollywood? Hends Angst, dass anderi Sender d Quote chlaued wills besseri Serie produziered?
Xinobrax2 hat geschrieben:zwirrlibatz hat geschrieben:me macht doch e verluschtserie nöd eifach wiiter nur will dänn de verluscht chli chliiner chönnt werde.
Einersits verständlich, aber s Risiko wird ja nid chliner, wenns d Ressource statdesse wider ines neus Projekt stecked...im Gegeteil. D Chöschte und de organisatorisch Ufwand stiged denn ja wider. Da wärs unter Umständ ev. sinnvoller es paar Episode z striche und e abschlüssendi Staffle oder au eifacht nur en Film z produziere. Mir chunts chli vor als würdeds Lotto spile...Alli hoffed uf s nögschte Lost, Walking Dead oder Game of Thrones...wenns nid a dem Erfolg chan achnüpfe ladets eifacht im Müll.
PS: Twin Peaks isch würklich super
Also sie sorry, aber do gotsmer änhlich wiä am Zwirrli, diä Argumentation verstandi jetzt nid ganz.
Villicht hämer au chli unterschiedlichi Vorstelligä devo wiä so Seriä i de Regel produziert werded. Wenn e Serie kei oder zumindescht nid de Vorstellig entsprechend Cholä zrugbringt, wirdsi doch sicher nid eifach witergfüehrt, i de Hoffnig, dass sie evtl. i de Zuekunft i irgendenere Form denn doch no öper interessiert, und denn villicht no so viel Gäld ispillt, dasses sich denn doch no glohnt hätti (was allerdings denn sehr viel meh sii müest, wemer diä verstrichnig Zit mitiberächned), das isch us Investorä Sicht genau so Lotto. Das macheds vilicht mol es momäntli, wenns irgendwiä doch sehr überzügt sind vom Ganzä, und dra glaubed dasses no aziehd, und nur d Quote nid ganz de Vorstelligä entspricht, abers immerhin keis Verluschtgschäft isch.
Wenn scho so und so viel Millionä in Sand gsetzt hesch, seisch irgendwenn ok, limit erreicht, meh setzi nüm i das Projekt wo niened heräfüehrt. Neui Projekt choschtet natürlich au, aber bringed au neui Hoffning, neui Mänschä, neui Ideä... dem stohd es alts Projekt wo nid funktioniert nur im Wäg. Und im Gägäsatz zum altä Projekt, womer ebä ufgrund vo de Erfahrig devo usgohd dass jedä investierti Dollar en verlorene isch, vodmer bim neuä wieder vo 0 a, und god natürlich devo us, dass sich d Investition lohnä chönt (suscht würdmers jo nid machä). Zudem isches jo nid so dass diä Seriä ide Regel scho vo A-Z durädänkt sind, und nur willmersi agfangä hed chöntmersi au schnäll no inere Mini Stafflä, au no guet dezuä anä, beändä. Sets choschtet au wenns scho stönd, und Lüt schaffed au nid gratis.
A sonerä Serie sind oft au sehr viel Lüt beteiligt, und einigi villicht nid so eifach ustuschbar. Villicht hed de Hauptdarsteller inzwüschä au wieder es bessers Agebot übercho wonem Erfolgsversprächender schiint und de Vertrag für witeri Stafflä nonig unterschribä, oder d Writer händ d Luscht am ganzä verlorä, zum diä eint oder andere bhaltä müstmerne besseri Konditionä bütä, oder mer müsst sie uswächslä und beides isch bimene Projekt wo eh uf de Kippi stohd denn villicht würklich eifach zuviel des Guten. 3 vo 5 Investorä währed villicht no debie, aber 2 händ kei Luscht meh und fürs fehlende Gäld gfinded mer niemert meh, oder d Investorä säged ihr chönd witermachä, aber en Season dörf nur no halb soviel choschtä, wills bi dem Projekt nid meh Risiko chönd igoh, was bi allnä andere dezuä füehrt dass d Händ verwerfed. De Sänder seit, chönd witerhin en Sändeplatz ha, aber sicher nüm zu derä Sändäzit wenns eh niemert luegt, d Chancä gha, jetzt chund es anders Projekt a derä guete Zit nach derä andere erfolgriichä Serie, was d Hoffnig druf dass sich villicht doch no en Erfolg istellt bi de Produzäntä wiederum schmölert.
Diä Vorgäng gits jo bi Film alli au, ein hed e Idee, denn sammlets Material, den schriibter öpis, Rächt werded umänandverchauft, Gäld gsuecht, Schauspieler agfrögt, Regiesseurä gwächslet, je nach Film villicht scho Prototypä erstellt, Setdesigner beuftreit, und wieder ein, wo wieder eimol meh sganzä Script umschriibt etc. pp. Und nid sältä wird vo vilnä Lüt viel gschafft und viel Gäld usgeh, und am Schluss wird diä ganz Üebig denn doch no abblosä, oder zumindescht uf Iis gleit... hin und wieder sogar obwohlmer scho hed afangä drehä, will irgendöpis nid nach Plan funktioniert hed, und verschiedeni Lüt de glaubä dra verlorä händ und vom Projekt abspringed unds nüm vernünftig heräzbüügä isch.
De Unterschied isch halt dass de Film nur dänn zum Publikum chund, wenner alli Hürdä überwundä hed, während e Serie i de Regel ebä Work in Progress isch, bis halt diä letscht Stafflä abgschlossä isch.
Abgseh devo wär aber z.B. Deadwood en Serie woni gern no meh gseh hätti devo... händs jo glaub eigentlich au mol no welä 1 oder 2 Film machä in Folge... det händs au gfundä, dass eifach s Setting zu ufwändig isch, unds eifach z tüür wird. Villicht sinds no chli Früäh gsi.
Im Moment na i de 2. Staffle. Gueti old school Action!
En abschlüssende Film wär nett gsi...Immerhin het de Autor i dem Fall verrate, wies witergange wär..
Oder kennt susch gar no öpert e aktuelli Science Fiction Serie? Am beste eini im Weltall....
Also würdi villicht vo sonerä Serie au nur es paar Episodä luge... uf Netflix gits jo au no ganz viel anderi Sachä womer cha luege 