The(G)Forum

findeder nöd au? klar, s internet gits, aber emails, oder post häts scho gäh. reise, telefoniere, tv, video, flugzüg, strom, esse. öffnig vom oschte, konsole, pc games etc. isch alles scho da gxi. vieles isch chli schöner, aber au steriler und langwiliger worde. viellicht hät mini wahrnähmig au mit em alter ztue.

guet isch, dass jetzt AIDS quasi heilbar isch für diä, wo gnueg geld händ. aber sus? alles, was ich hüt mach, hanni au scho chönne. s inet isch eifach min pause oder stammtisch. gändert hät sich eigentlich aber nüt.

Die Feststellig isch eher es Zügnis vo dire beschränkte Wahrnehmig, ev. sogar mangelnde Reflexion.
D'Adaptionsfähigkeite vom Mönsch und dr viune innewohnend Drang/Zwang nach konstante Habitus cha durchuuus derzue füehre, dass mr dr stet Wandel als Gliichstand aaluegt.

habemus papa

mensche sind immer gliich. öbs jetzt ihres stammtischbedürfnis am lagerfüür, ire stammkneipe oder im g-forum befriediget isch nur oberflächi... dä gege hät drum scho rächt...

ës hett sicher Epoche gäh, wo sich chli meh veränderet hett. Allerdings wärde Veränderige vo gwüsse Zite, ir Retrospektive betrachtet, au verfälscht. D Implikatione vor Erfindig vo de Wright Brüeder (de Flugi, für di unbedarfte) si im hingere Ämmithau sicher nid eso wahnsinnig gross gsi. (Du gäll, isch dis Bischpil gsi mit de Flugis). Würklichi Implikatione hett das ersch ide 50-60er Jahr gah. Und denn no viellecht ide 90er mit de Erfindig vo Easy Jet und Ryan Air etc. Pipapo, und denn zägg, hei mer dini Theorie grad widerleit. Veränderig isch e schlichendi Agleheit, und numme wülls hie keh grosse Chrieg hett gäh isch si dennoch permanent vorhande.

hanf hat geschrieben:mensche sind immer gliich. öbs jetzt ihres stammtischbedürfnis am lagerfüür, ire stammkneipe oder im g-forum befriediget isch nur oberflächi... dä gege hät drum scho rächt...

25'000 Jahr vor üserer Zit:



Hüt:



oder no besser:


Quelle

ja, cha meh gäh.

Astroboy hat geschrieben:Die Feststellig isch eher es Zügnis vo dire beschränkte Wahrnehmig, ev. sogar mangelnde Reflexion.
D'Adaptionsfähigkeite vom Mönsch und dr viune innewohnend Drang/Zwang nach konstante Habitus cha durchuuus derzue füehre, dass mr dr stet Wandel als Gliichstand aaluegt.

wo häsch de seich abgschriebe? :typej:

was chasch jetzt meh mache als vor 20 jahr?

Hey nei. Nüt chame meh. S'isch aues no gliich.
Blib bi dim zfridne Läbe, ignorance is bliss.

Ich teile bitz dä Iidruck vom geosnow (wobii, ich weiss au nöd was ah dä Front vo dä Forschig i dä wüsseschaftliche Diszipline grad so vorsichgaht).
Dä gemeint Iidruck isch glaubs scho, dass Villes scho vor langer Ziit Erfundene stetig optimiert wird.
z.B. dä Rollstuehl: Siit Jahrhunderte gits en scho, aber wo isch sExoskelett wo en ändlich ersetzt?
(Ja, ich weiss, isch de Entwicklig).

hanf hat geschrieben:mensche sind immer gliich. öbs jetzt ihres stammtischbedürfnis am lagerfüür, ire stammkneipe oder im g-forum befriediget isch nur oberflächi... dä gege hät drum scho rächt...

sBedürnis nach Gmeinschaftlichkeit isch sicher e Konstante, aber sVerhältnis vom Mänsch zu sich sälber und dä Würklichkeit isch immer scho im Wandel gsi und folglich dä Mänsch sälber Veränderige underworfe.

Astroboy hat geschrieben:
Hey nei. Nüt chame meh. S'isch aues no gliich.
Blib bi dim zfridne Läbe, ignorance is bliss.

zerscht quotisch öpis, wo nöd selber gschriebe häsch und jetzt das. guet, du lebsch au nonig so lang, aber was hät sich i dim lebe ide letschte 10 jahr grundlegend veränderet? häsch bessers esse, chasch für 5x weniger geld de glich lebensstandard hebe? häsch es auto mit 1l verbruch, chasch uf de mond? spielsch besseri games? häsch e schöneri frau? chasch meh ummereise? gits weniger gxetzt, wo dis lebe ischränked?

klar, du häsch jetzt es ipad. aber was häsch du schlussendlich meh devo? chasch ja eifach au e ziitig chaufe und guet isch.

vilech sött me chli klarstelle vo welne bereich me redt. es hett sich sehr viel gänderet und sehr viel isch immerno gliich. voll kän widerspruch. schno kreisi wemme so dänkt.

de gege hett scho rächt.

zwirrlibatz hat geschrieben:vilech sött me chli klarstelle vo welne bereich me redt. es hett sich sehr viel gänderet und sehr viel isch immerno gliich. voll kän widerspruch. schno kreisi wemme so dänkt.

de gege hett scho rächt.

Logisch hett er rächt, aber für sowas muess er viu gneuer spezifiziere vo was dass er redt.
Scho nur technologisch, Mobilkommunikation, Erreichbarkeit, Mobilität, Vernetzig, täglechi Ablöif,
das alles isch imne riesige Wandel. Hallo, Gliichberächtigung? Es ganzes Gschlächt wo im Prinzip ersch sit churzem drann isch, annährend die gliiche Recht z'bercho. D'Verbreitig vo Pornographie, dMüglechkeit, viu früecher viu meh vor Wäut zgse, öb dür ds billige Reise oder dürs Internet. Es git so vieles.

I weiss ja scho was er meint, ihm geits eifach meh um dä langsam Wandel als Konstante, öppis subjektivs.
Aber so tue als wär nüt passiert isch eifach hohl imho.

geosnow hat geschrieben: zerscht quotisch öpis, wo nöd selber gschriebe häsch und jetzt das.

Hä?

ROFL!

Astroboy hat geschrieben:Aber so tue als wär nüt passiert isch eifach hohl imho.

mich dunkt nöd dass er so tuet. umgekehrt dunkts mich du hesch s'gfüehl, d'lüüt erläbed hüt meh als früehner. und das wär e so naivi wie falschi sicht. bisch chli imne mediedelirium?

1992, huere abgange isch es.

zwirrlibatz hat geschrieben:mich dunkt nöd dass er so tuet.

geosnow hat geschrieben:ide letschte 20 jahr hät sich eigentlich nüt gänderet

Mi dünkts scho

umgekehrt dunkts mich du hesch s'gfüehl, d'lüüt erläbed hüt meh als früehner. und das wär e so naivi wie falschi sicht. bisch chli imne mediedelirium?

Nei, das hani dermit definitiv nid wöue insinuiere. Ha eifach aube mini Müeh mit derartige Verchürzige wie dr Starpost und wittere nach wie vor e Äbeninekonflikt, drum hani ja ou so scharf drigschosse. Was me säuber mitberchunnt und was schüsch aues no so geit si verschiedni Paar Schueh, wo aber i so Diskussione gärn zäme aagleit wärde.

Hallo, Gliichberächtigung? Es ganzes Gschlächt wo im Prinzip ersch sit churzem drann isch, annährend die gliiche Recht z'bercho.

"sit churzem" heisst...? willsch du ernschthaft säge, fraue sind hüt uf de wält gliichberächtigter als vor 10-20 jahr?

D'Verbreitig vo Pornographie,

ok fair. das isch würkli wichtig und super. und i de 90er jahr hesch würkli nienets en porno brcho. und wenn doch, dänn hesch en schtändig zu de lieblingszene müesse füreschpuele.

dMüglechkeit, viu früecher viu meh vor Wäut zgse, öb dür ds billige Reise oder dürs Internet.

gäll du bisch so um die füfezwänzgi? chasch du mal beschriebe, wie d'lüüt i dire vorstellig so ändi letschts jahrhundert gläbt händ? meinsch sie händ strom und wasser gha? ich bin bis 1990 scho drümal um d'wält greist (aso so richtig mit körperiisatz und han föteli sälber müesse mache) und das isch weder ussergwöhnlich no unvermögbar gsi.


und so näbebii, wenn du scho vomne technologische Wandel und Mobilkommunikation, Erreichbarkeit, Mobilität, Vernetzig, täglechi Ablöif redsch, dänn nöd vergässe dass de i de letschte 20 jahr öppe 24% vo de mänschheit mitbercho hett.

Astroboy hat geschrieben:Nei, das hani dermit definitiv nid wöue insinuiere. Ha eifach aube mini Müeh mit derartige Verchürzige und wittere nach wie vor e Äbeninekonflikt, drum hani ja ou so scharf drigschosse.

es chunnt ebe nöd nume druf ah was me seit sondern au wie.

nur scho s'internet isch glaubs nachem Rad und em Buechdruck öppe s'gächschte. D'Vernetzig hät euses Lebe, eusi Infobeschffig und euses Konsumverhalte so dermasse verändered, dass es gar kein Vergliich isch mit 1992. geil isch no, dass mer über das da imene forum disktuiered, wo die einte über s'handy posted, oder am schaffe sind und eifach gschnell mal iilogged oder dihei mit em laptop im garte sitzed und über Wireless driischriibed. Nei, hät sich gar nix verändered.

geosnow hat geschrieben:was chasch jetzt meh mache als vor 20 jahr?

ich chan znacht am zäni usem huus an tankstelleshop go fässalie und flüssigs hole (wenn de chüelschrank leer isch)

turntablism hat geschrieben:

geosnow hat geschrieben:was chasch jetzt meh mache als vor 20 jahr?

ich chan znacht am zäni usem huus an tankstelleshop go fässalie und flüssigs hole (wenn de chüelschrank leer isch)

Ig cha hüt am Oschtermäntig i Baumarkt gah es paar Kabelutensilie für mi neui Hobbyruum chaufe, oder cha am Grüendonnschtig gah Party mache, ohni angscht ds ha, dass als am 10ni zuegeit.

ui. scho 2 Sache meh.

De Aschtroboy het scho rächt - der Eröffnigspost isch quatsch will verallgemeinerned, selektiv und vorallem halt hert eurozentrisch, bzw. ufem geoschnee sis eigete Läbensgfüehl bezoge. Wennme sech entweder entschliesst der Wandel z ignoriere oder en effektiv nid gseht, denn chame scho s Gfüehl ha es sig alles gliich blibe - luschtigerwiis ou die beschti Usgangslag für en reaktionäri Istellig sobald denn mol öppis als würklechi Veränderig wohrgnoh wird.

h4xX0r hat geschrieben:nur scho s'internet isch glaubs nachem Rad und em Buechdruck öppe s'gächschte. D'Vernetzig hät euses Lebe, eusi Infobeschffig und euses Konsumverhalte so dermasse verändered, dass es gar kein Vergliich isch mit 1992. geil isch no, dass mer über das da imene forum disktuiered, wo die einte über s'handy posted, oder am schaffe sind und eifach gschnell mal iilogged oder dihei mit em laptop im garte sitzed und über Wireless driischriibed. Nei, hät sich gar nix verändered.

ich han scho vor 20 jahr schnell uf LA aglütet und im skateshop die neuschte boards und turnschueh bstellt. schnell alüte und scho weiss ich, wases neus git. zB autosalon. 1 tag nach de öffnig, hät mer die neue autos und errungeschafte ide ziitig gxeh. hüt isch es nöd glich. mer erfahrt im inet die würkliche neuheite au nöd schneller. klar B2B hät sich einiges gänderet, aber schlussendlich sind grad wichtigi vertragsabschlüss immerno glich müehsam. häsch schomal online ghüratet oder en grundbruech itrag gmacht?

wiä gxeit, s diskutiere im forum isch aber au scho 15 jahr alt. also nüt neus. mit em händy surfe isch nett, aber nöd wahnsinig. und de arabisch früehlig isch viellicht au nöd nur em inet zverdanke gxi. im 1991 häts ja das nöd gäh und de ganz oschtblock isch zämegheit.

just in time produktione häts au vor em inet gäh und händ sogar funktioniert.

24h shops

häts in st. galle, NY, Tokyo, Bali, Griecheland scho vor 30 jahr gah.

fraue stimmrecht

gits au scho länger ims schwiiz. en fortschritt wärs im islamd.

party mache

machsch witz, früehner häsch eifach schnell e goa party im wald gmacht. jetzt brusch e million bewiligunge. da isch s gxetzt scho viel herter worde. also en krasse rückschritt.

stüre spare

das isch besser worde ide letschte 20 jahr. so händ die riiche no meh geld und d scherr gaht no wiiter uff.

Sephi hat geschrieben:De Aschtroboy het scho rächt - der Eröffnigspost isch quatsch will verallgemeinerned, selektiv und vorallem halt hert eurozentrisch, bzw. ufem geoschnee sis eigete Läbensgfüehl bezoge. Wennme sech entweder entschliesst der Wandel z ignoriere oder en effektiv nid gseht, denn chame scho s Gfüehl ha es sig alles gliich blibe - luschtigerwiis ou die beschti Usgangslag für en reaktionäri Istellig sobald denn mol öppis als würklechi Veränderig wohrgnoh wird.

eh, es isch vom weschtliche standpunkt so und vo mim eigete läbensgfühl bezoge gxi. behaupte au nüt anders.

verzell mir, was würklich anders worde isch!