The(G)Forum

Also, es gaht um folgendes:

Bi eus gahts ja rächt strub zue und her und sit minere letschte Lohnerhöchig (s letscht mal wos "richtig" ufe isch 1.4.2010, 200.-) isch d aforderig und d arbetsbelaschtig ums fasch dopplete agstiege.
De chef wieglet immer ab wäni mit ihm über das Thema rede und irgend wänn langets mer eifach.

Was ich jetzt mache chönnt wär ihne d Chündigung ufe tisch haue und luege was passiert. Ohni mich chömeds in gröberi Problem ine - und das isch die einzig Möglichkeit woni gsehne das ne so richtig an sack chan und mal zuetrucke chönnt.

Hät öpper schomale Erfahrig mit so öppisem gmacht oder kännti en anderi art wieni zu meh stutz cho chönnt?

Würd ne in AssKicke. Oder Lotto spile. Oder mach Indooranlag.

Würd mou d Kündigung adrohe und säge, das evtl. öpis anderschs wirsch Sueche, wenn nid meh Moos überchunsch. Mau luege wiesi reagiere. Hani so gmacht, nid meh übercho und bi när zum Glück abghaue. Katschinnngggg

gnueg heu dunnä

Mit Chündigung drohe bringt nüt. Chünde und fertig!
Woni mou so kündt ha hends mer e Lohnerhöhig vo 400.- abote. Ha nid agnoh; Kohle elei isch für mich kei Chündigungsgrund.

Chunnt uf din Chef und GL druff a. Bi mir heds funktioniert. 3 mal i zwei verschidne Budene. Da wo ich schaffe wönnds nid verhandle und verhandled erst mit dir, wenn sie kein Wahl hend.
Isch natürli immer en heikle und mir sött d Person womer verhandled sehr guet känne. Aber wenn mer das muess mache, muess mer sich au überlege, öbs das überhaupt bringt. Well denn sind sicher no ander Problem ume.

binere instanz chöcher go meckere hesch de scho probiert?

asüscht e arbetszügnis verlange. (wink mit em zaunpfahl) das müens der immer geh. oder ebe halt eifach chünde. so schlimm wies dete zue und her gaht würd i mi aber au frage öb sich das für die lohnt. meh chöle defür die physisch u psychisch kabut mache lah. i weiss ja ned.

wenns dir eh niä meh zahle wänd, obwohl scho ahgfröged häsch, würdi chünde. hani au gmacht. tuet guet, mal en neue horizont zha. gueti lüt werdet immer gsuecht. aber zerscht s zwüschearbetszügnis verlange. wenn das häsch, chündisch.

eis muesch immer als arbetnehmer wüsse: wenn de arbetgeber mues, wird er ohni zögere dir chünde.

zwüschezügnis, s arbetszügnis gits nachem chünde
würdi aber au so mache. und grad frischt setze bis wen dases muesch ha, zum dem chli nachdruck verleihe.

zwüschezügnis beaträge
chünde
punkt

wenner dich würklich brucht chunnter denn scho und denn seisch willsch 34234234234234.- meh im Jahr.

geosnow hat geschrieben:eis muesch immer als arbetnehmer wüsse: wenn de arbetgeber mues, wird er ohni zögere dir chünde.

in der tat.

Werde ein nach de chündigung überall d ferie gstriche odr hetmer immr no es recht druf? D überstunde verfallw wohl logisch

oh mann du scho widr, schmeiss de dreck doch ane. ich weiss nöd wieso ihr so a oirne drecksjöbs hanget. "chündigung adrohe" isch öpe glich weich wie d arbetsgeber fängs mit dir umgönd.

Überstundä verfalled... eifach so? Bisch sicher?

thaeye hat geschrieben:oh mann du scho widr, schmeiss de dreck doch ane. ich weiss nöd wieso ihr so a oirne drecksjöbs hanget. "chündigung adrohe" isch öpe glich weich wie d arbetsgeber fängs mit dir umgönd.

Wahr.
S'git immer wieder Gründ, werum dass me sech derart laht la usnutze (Angst vor keire Beschäftigung/Erhalt soziale Status/Konfliktuswichig usw), aber weme sech überleit, dass Zyt ungfähr e Milliarde Mal wichtiger isch als Geld, wöu jedi Sekunde nieh meh zrüggberchunsch, grad wed derart malochsch und dr im Prinzip nur säuber schadsch, de würdi dr würk mau überlege, öbde nid eifach wosch schiebe, resp. i hätts äuä scho lang gmacht.

Dänks doch mau dr anger Weg: Für jede Arbeitgeber bisch du z'ideale Opfer: Chrampfe bis zum umgheie und Misständ ohni Murre ertrage und di nid derfür ha, e Entschädigung füre Ufwand z'bercho? Da gits gnue (churzsichtigi) Füehrigspersone, wo sowas gnadelos usnütze. D'Frag isch eifach, öb du da würk wosch mitmache.

Acid hat geschrieben:Überstundä verfalled... eifach so? Bisch sicher?

nei ebe nid. wird das überall andersch greglet oder schribt das es gsetzt vor?

ich seg dene opfer

Reinforced hat geschrieben:Werde ein nach de chündigung überall d ferie gstriche odr hetmer immr no es recht druf? D überstunde verfallw wohl logisch

d'Ferie dürfet nöd gstriche werde.. die sind gsetzlich greglet. die dürfet au nöd usbezahlt werde. wie's mit dä Plusstunde usgseht, wüsst ich grad nöd.. würd aber im Zwiifelsfall vor dä Chündigung dä Stundesaldo vom Chef underschriebe lah oder grad vor dä Chündigung d'Stunde kompensiere... Im Idealfall chasch früehner ga, im mittlere Idealfall zahlets d'Stunde us und im dümmschte Fall chasch dr die as Bei striiche.. Aber wie gseit, ich känne da die gestzlichi Regelig nöd.. drum vom Chef uf jede Fall underschriebe lah..

Reinforced hat geschrieben:

Acid hat geschrieben:Überstundä verfalled... eifach so? Bisch sicher?

nei ebe nid. wird das überall andersch greglet oder schribt das es gsetzt vor?

Es gid sicherlich verschiedeni Regligä, und es chund glaub au druf a, wiä vil dasses sind.
Isch z.B. sicherlich in Branchä mit Gsammtarbeitsvertrag viel gnauer greglet als i serigä wos kein gid (det stoht denn z.B. bedingigä, wenn dass es chan mit Freizit kompensiert werdä, wenn dasses Uszahlt werdä mues (und vor allem dasses mit Zuäschlag mues uszahlt werdä) usw.. Das gilt aber ebä zum Teil glaub allgemein. Will es gid jo en Grund dassmer gwüssi Stundäazahl, Zitä usw. abmacht, wemer en Job definiert.

Wenns nid usdrücklich en Teil vom Bruef isch, und au so im Vertrag stohd, dass Überstundä vorchömed, dassi müend gmacht werdä und dassi nid kompensiert werded (und wer so en Vertrag mues unterschribä isch normalerwiis jo au inere gwüssä Stellig, hed e gwüssi Verantwortig, und wird au dementsprechend entlohnt), wirds wohl chum eifach so chönä ohni Kompensierig verlangt werdä.

Wär jo relativ absurd, wenn ein ständig unzähligi Überstundä verlangt, und d Kompensierig Johr i Johr us verschiebt, bis ein d Schnurrä voll hed, und wäg dem chünded, und denn diä ganz so vollbrachti Leischtig nüt meh söll Wert si.




Edith seit dezuä: lueg do stohd ganz vil. Chund also uf verschiedeni Umständ ah, wiä si gnau kompensiert werded, aber dassi eifach nid kompensiert werded, isch nur i ganz speziellä Fäll möglich, und denn würdmers wüssä, wilmers so unterschribä hed:

http://www.ktipp.ch/artikel/d/arbeitsre ... den-geld/n" onclick="window.open(this.href);return false;

problem, mit 'wichti' sii isch, dass das obedrah usme andere blickwinkel gseh wird. vilicht nöd din direkte chef, aber sicher scho bim nägschte lauft das so, das jede ersetzt wärde chan. bidä einte rumplets echli meh, bi dä andere echli weniger. und vergiss nöd: dä jung fliissig tubel, wo führn hungerlohn, 14h im tag büglet, gits immer und 'wartet nur druff, din job überneh z'chöne'.

also au wenn chündisch, stell di mal druff ih, doku zschriibe, din nachfolger muss dich ja chöne ersetze

was ich bi eus jetz no rächt hüfig gsehne: chünde und nacheme jahr mit titel und höcherem lohn wieder ahstelle lah.

feeshlee hat geschrieben:also au wenn chündisch, stell di mal druff ih, doku zschriibe, din nachfolger muss dich ja chöne ersetze

lies ig do es zynische spruch use?

Wennd nöd im Strafregister bisch oder suschtigi Problem häsch findsch eh wieder en Job. Und du schaffsch doch ide Informatik, fallsi mi nöd irre. Mach dir kei Sorge. Duen chünde, chills es bitsli, suech en Job i dere Ziit. Im allerschlimmste Fall gits no ALV aber das wirsch du nöd mal bruuche wenn du dir gnueg Müeh gisch bim Job sueche.

Glücklich sii im Job >>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>Geld

feeshlee hat geschrieben:problem, mit 'wichti' sii isch, dass das obedrah usme andere blickwinkel gseh wird. vilicht nöd din direkte chef, aber sicher scho bim nägschte lauft das so, das jede ersetzt wärde chan. bidä einte rumplets echli meh, bi dä andere echli weniger. und vergiss nöd: dä jung fliissig tubel, wo führn hungerlohn, 14h im tag büglet, gits immer und 'wartet nur druff, din job überneh z'chöne'.

also au wenn chündisch, stell di mal druff ih, doku zschriibe, din nachfolger muss dich ja chöne ersetze

S fette isch so wahr. Bescht post bisher.

mach grad au wider die erfahrig, das jede chasch ersetze. d schtell wird intern bsetzt. anderschume schtelleds türi hochschuelfutzis oni bruefserfarig ih, wo weder termingrächt no konstruktiv schaffed und nume i eiget sack wirtschaftet. devo heds da aktuell leider fascht meh als vo de arbeitende spezies. krass wie scheisse die unternehmenskultur isch. nümm lang

mir isch ebe so gange, dass mal dä management gfunde hat: 'dini rolle isch identifiziert worde zum uf indie verschobe werde. du häsch jetz 4 mönet ziit, zum was anderes intern finde, nachher isch sense'

ha däne gseit, dass wänn sie würkli gründlich recherchiert hättet, würded sie wüsse, dass es nöd so eifach isch die arbet öpper anderem geh. das isch mitme blich am bode quittiert worde. ich han intern was anderes gfunde und bin dänn ganzi 5 meter näb mim ursprünglich platz gsässe. han natürli därfe doku schriibe und frage beantworte, bevor ich gwächslet bin.

und dänn isches losgange: die drü in indie (ja, füren schwiizer mitarbeiter chasch drü in indie iistelle) liefered nöd, sondern stelled meh frage. dänn liefered sie, aber völlig falsch. es git krise-sitzige und taskforces und weiss dä gugger was. also: es rumplet echli. natürli wird alles gäg obe bizzli schöngredt, solangs gaht. irgendwänn gahts nüm und sie müend wieder eine da ide schwiiz astelle. natürli nöd irgenden dähergloffene, sondern eine mit abgschlossenem studium. dä wird dänn mit titel und fettem salär iigstellt und staht dänn die nächschte drü bis vier mönet bi mier und stellt frage. natürli hani mittlerwiile en andere job, wo viel arbet git und chan die frage immer nur tröpfliwiis und sehr sporadisch beantworte. ca 9 mönet, nachdem ich gange bin, isch alles wieder bim alte.

tja, die doku hät es bizzli besser chöne sii

s'offshoring-programm wird firmewiit natürli als volle erfolg kommuniziert und die lüüt, wo das azettlet händ, sind au scho wieder mit fettem bonus und pipapo weg.

und da redet mir eine vo zynismus.

de oberschtudierti bi üs isch ide qualitätssicherig und zueschtändig für das produkt wo ich herschtelle. vorene heder wider e vogel abgschosse; binere mässmittelfähigkeitsprüefig hemmer e toleranz vo 44 Mikrometer. Mini Teili sind alli im Bereich vo 3 bis 12 Mikrometer. Jetz heder e halb schtund welle diskutiere öb mer bim ne gmässne wärt vo 4,75 um sel 4,8um oder effektiv 4,75 um ufs messprotokoll schribe. entscheidige trifft er willkürlich, delegiert fascht alles und lad monatelang wichtigi termine schliife. i de vergangeheit hemmer de charre für ihn immer usem dräck gholt schprich d termine glich chönne ihalte dur überschtunde. dasmal nid er hed töibelet vo wäge liferziite ihalte, jetz ischer am arsch, wil er nachwislich für de produktionsunterbruch verantwortlich isch.