Seinfeld

[zwirrlibatz]

Läck isch das super. Ich hans früehner öppe chli und sehr zuefällig gluegt, abig spät mal im tv, aber vergässe oder gar nie bewusst gsi wie brilliant das isch. S'Meischte hett ja katastrofe galteret (Friends zbsp chasch hütt nüme luege) aber das schletzt hüt no alles wäg. S'Tämpo isch für so e alti Serie krass hööch und d'Idee vo jedere Folg wäred hüt no bi wiitem die Originellschte. Und um was gahts? Um NÜT! Ich schtirb schier bim gugge.



När muess ich tatsächli no de Cörb yr Enthusiasm luege.

[zwirrlibatz]

ha i de Episode 20 vo Siisen 4, wo ich jetz bin, spielt de Bub vo Day of the Dead. Und logisch en Spitalpatiänt.

[Acid]

logisch, ich han allermindeschtens zwüsched 20 und 30 mol vo Season 1 bis 9 alles durägluegt. Villicht no öfter.

Curb isch trotzdems ähnlich isch, rächt andersch. Aber genau so guet, nur chli astrengender. Au scho paar mol durä... hoffentlich chund Bald diä neu Season, wär langsam wider Zit.

Sind diä zwei Seriä woni ständig alli seasons ufem Laptopdesktop han. S erscht woni miteme Stick übere zogä han nachem Syschtem installiere.

[Astroboy]

Meins.

[Gurgelhals]

Ich mues mer immer s'Lache verkneife wänn ich im Coop oder i de Migros a de Papayas verbi laufe

[Moff]

für mich immer na bi witem die bescht sitcom.
de larry david isch eifach es genie, es isch unglaublich was ihm für details im alltag uffalled und wie er sie uf höchscht amüsanti art analysiert, umdreit oder is absurde füehrt.
ich han glaub sit 10 jahr kei folg meh gseh, aber es chunt fasch täglich vor, dass ich mich im alltag a situatione us seinfeld erinneret füehle. ganz grossi serie.

[Moff]

han friends übrigens damals scho scheisse gfunde, gnau wie 99% vo comedy sit immer

[Moff]

de jerry het vor paar tag übrigens au es AMA bi reddit gmacht, sehr lesenswert. under anderem gaht er au druf i, öb seinfeld iets würkli en show über nüt isch

[zwirrlibatz]

ich han friends zersch heti (also scheisse) gfunde und dänn ischs mir mal no easy worde. so chli en haha für zwüschedure. und das meischtens nume wäg de phoebe. für die wält isch sie ja e wahnsinnig schräg krassi gsi. aber ebe hüt im nachhinein isch es mir unverständlich wie das so hett chöne iischlah. so langwiilig und schtier. wobii, ebe, isch für hetis halt...

[zwirrlibatz]

de jerry het vor paar tag übrigens au es AMA bi reddit gmacht, sehr lesenswert. under anderem gaht er au druf i, öb seinfeld iets würkli en show über nüt isch

nöd gläse. suechi.

yep wemme so will ischs ehner e show über alles. s'läbe, s'universum und de ganzi räscht. ohni sitcom serie schtori und nur i letschterem sinn über nüt.

[Moff]

das mitem "show about nothing" isch ja au ehner us dem use enstdande, dass se jerry und de george mit dere idee i de serie selber zu nbc gange sind.
d'lüt sind denn natürlich devo usgange, dass mit dem einigermasse dargstellt wurde isch wie de larry david und de jerry seinfeld das damals selber gmacht hend, ned wit hergholt. vo dem her findis iets ned unnahvollziehbar wenn seinfeld hüfig so beschriebe wird.

wemer ehrlich sind, en show über nüt isch irgendwie au sgliche wie ein show über alles

[zwirrlibatz]

das han ich mich dänn nach dere "isch e serie über nüt" folg denn au gfrööget, wie sehr das so würkli gange isch. vermuetlich halbe scho und dänn händs es vereifacht überspitzt ine folg packt. aber das isch ja mittlerwiile wohl nöimeds dokumentiert...

so wie die folg "über nüt" isch bzw was sie drus macht, isch sie über alles was eim so beschäftigt. e schlächti serie brächti das nöd zwingend ane nur mit dere vorgab. aber ebe, die da isch scheff und drum gaht das.

[zwirrlibatz]

ah ja ich lies grad de AMA, isch frisch.

[abyss]

Si no gächi Sitcoms gsi!

Ha vo letscht mal versuecht Big Bäng Theorie z luege. Entweder bini humorresistent oder das isch eifach nume unlustige Gagg. Verstah dr Hype absolut nid…

Süsch luigi gärä Sitcoms.

[Acid]

Also wemer d Entstehigsgschicht vo de Serie (also diä würklich, nid diä i de Serie innä) ghört, isch diä au nid so viel andersch.

Show über nüt isch halt wohl meh dänkt, dassi halt nid irgendwiä bestimmti Themä befolgt, und mehr devo läbt für diä meischtä völlig unwichtigi Alltagssituationä z pervertiere. Isch aber natürlich no bi vilnä Sitcoms so, und im Verlauf vo de Stafflä, isch sie natürlich au mutiert wordä, und es gid denn ebä doch gschichtli, entwicklgä, problem usw.

Aber wiener halt i de Serie seit, somtimes even nothing is something. Wemers wiä de Goerge will duräboxä, gsehdmer jo wiä wit s Projekt fortschrittet...


Friends hed halt harti Nippel drininnen. Glaub kei unwesentlichä Punkt im Erfolgsrezept vo de Serie. So Schlächt wiä ihr säged hansi aber also au nid gfundä... und wemer Bedenkt dass hütigi Seriä teilwiis fascht 1:1 Szene und Ideä vo Friends abkupferet (natürlich au vo Seinfeld) und demit no Erfolg hend... aber ebä, ich lueg lieber eifach nomol Seinfeld, lieber als Seinfeld, und lieber als en moderni Sitcom.

De Gross Unterschied stoht halt au drin, dass was d Charaktere betrifft Friends so das typischä Muschter hed. En Serie brucht es paar Typä, vo denä ein sicher mues en Ufrisser si wo bi de Frauä achund und vil Sex hed und ein mues en sensiblä sii wo sich diä ganz Zit verliebt. Denn bruchts es paar Frauä, wenn möglich eini wo chli verruckt isch, und denn no liebi, romantik, bitzli brüele, im Trainer oder Pijama umägammlä und Glace ässä wenn de Obig nid gloffä isch wis hettet wellä.

Bi Seinfeld isch das halt scho chli andersch, erschtens sind alli nid bsunders empathisch, und sie liebed sich gägäsitig indemsi sich jewils über d Problem vo de andere luschtig mached (was aber nid brutal überechund, well d Problem wos händ vill z'absurd sind), und zweitens sinds irgendwiä vil herter gschnitzi und übertriebeneri Figurä. Und nur scho d Konstellation. 3 Typä, alli völlig verschidä, und ei Frau. Und a de Frau gsehdmers au guet, d Elaine isch alles andere als diä obligatorisch Seriä Frau, sondern wahrschindlich eini vo de Emanzipiertischä Frauä i Seriä überhaupt, und eifach "one of the Guys". Eigentlich ebä no rächt muetig.



@ Zwirli: Ja eh... gid au es Filmli the seinfeld story oder so... weiss aber nüm um was es alles sucht no got det drin, luegsch villicht lieber erscht am schluss.

[zwirrlibatz]

S'sött zwar es Seinfeld und nöd es Serietopic im allgemeine werde (grad ebe will) aber husch zum Big Bäng: Die erschte ca 6 oder 7 Staffle sind schampar schlächt wills us de eh nöd sooo originelle Prämisse au nüt würkli Gschiids macht. Em Sheldon sini sozial Inkompetänz als eine vo de grosse Ufhänger chan nöd platter und repetitiver verwurschtlet werde, aber i de letschte öppe 2 Staffle isch s'Niveau rächt ahgschtiege. Vilech hetts nöii Schrieber, kei Ahnig. Werum ich aber 8 oder 9 Staffle Big Bäng überhaupt känne isch mir zwar au es Rätsel. Guilty Pleasure halt. Znacht spät nach Rockenproben.

[zwirrlibatz]

Egal, SEINFELD!

[abyss]

[PlanetHarrieR]

Na ja, es war schon eher Seichtfeld und etwas spießig. Aber auf angenehme Art seicht, auch mit einigen guten Gags. Eine schöne Sitcom, wen man nachts mal Abschalten und sich berieseln lassen wollte.

[zwirrlibatz]

mit deutscher synchro vielleicht, weil übersetzt halt immer schwächer ist...

[PlanetHarrieR]

Ja, auf deutsch seinerzeit im Tevau. Kann natürlich sein, dass die synchro da ähnlich schlecht ist wie bei Big Bang.

[PlanetHarrieR]

Lloyd ist übrigens ein extrem cooles Wort.

[zwirrlibatz]

seinerzeit

das isch evtl de fähler. während einiges schlecht alteret, find ich anderes wie dieses da viel besser heut.

[Acid]

lol... synchro...


Quelle

Quelle


Chlinä Bonus woni grad wider gseh han, heds nid i derä Form i d Show gschafft:

Quelle


Aber natürlich, es isch e Sitcom wo i de 90er im werbefinanzierte Fernseh gloffä isch. Es isch sehr unschuldig gmacht, und nid all zu grob, all zu provozierend, oder all zu anarchistisch. Allerdings ebä au nur uf de erscht Blick.

[zwirrlibatz]

heiliger strohsack!


Wemme Seinfeld flach und ungfährlich find, isch me sälber chli flach und bruucht halt alles explizit krass mit 7567965 Usruefzeiche an Grind grüehrt drmit me überhaupt no uf was reagiert.