Wie bisch Krankeversicheret?

[Noldi_Palmer]

Was chostet Privat? Lohnt sichs?

[geosnow]

freii arztwahl isch guet. privat isch glaubs erscht ab 60gi mit goofe no ahgnähm. sus wirds dir aber langwilig, wenn nur allei bisch. okay, jetzt häsch internet etc. aber gell, unfall und kranket isch unterschiedlich, wenn schaffe tuesch.

[Acid]

Was chostet Privat? Lohnt sichs?

Wenn vor hesch de Rescht vo dim Läbä hauptsächlich im Spital z verbringä ischs sicher no easy.

Wenn allerdings vor hesch möglichscht gar niä zgo, würdi sägä isches also eher chli zwifelhaft. Und wenn würkclih mol am Arsch bisch, isch jo denn au nid s entscheidenschte öb no en andere im Zimmer hesch oder nid.

Am Geo sin Punkt isch nid de tümmscht... klar, chan sau dumm sii, wenns Müähsam isch, s der sowieso verschisse god, und denn hesch no Lüt im Zimmer wo alles nid wänd was du willsch, komischi Grüch verbreitet, und so witer. Andersits chönd Zimmergspöndli en relativ langwiiligä Ufenthalt imene tristä Spital au sehr beriichere. Nüt besser als Stundälangi Diskussionä, wemmer eh nüt bessers ztuä hed. Drogä hi oder her.

[Xinobrax2]

Ich han keini. Bin halt chli Risikofreudig...

[Herr Rossi]

und denn hesch no Lüt im Zimmer wo alles nid wänd was du willsch, komischi Grüch verbreitet, und so witer

vor allem wemmer sälber zu "dene lüüt" ghört

Andersits chönd Zimmergspöndli en relativ langwiiligä Ufenthalt imene tristä Spital au sehr beriichere. Nüt besser als Stundälangi Diskussionä, wemmer eh nüt bessers ztuä hed. Drogä hi oder her.

so hanich das erläbt, woni vor 5 johr für eim monet as spitalbett (allgemein) gfesslet gsii bi. mis zimmergschpänli isch mittlerwile e sehr guete fründ, und mir sind sehr gägesätzlech i vilne läbesbereich (politischi gsinnig, ischtellig allgemein, freizitbeschäftigunge etc.) merksch wie chli das eigentlich bisch und wie wichtig kommunikation. bis uf d tatsach dasi fascht mis bei verlore ha e super erfahrig

[geosnow]

Ich han keini. Bin halt chli Risikofreudig...

indirekt häsch sowieso eini. also chasch au defür zahle.

[Xinobrax2]

Ich han keini. Bin halt chli Risikofreudig...

indirekt häsch sowieso eini. also chasch au defür zahle.

Ich han eini au weni na nie irgendwas zalt han? Echt jetzt? Wiso? Isch ja nid fair gegenüber dene wo zaled...ich wot ja gar keini :/
D Frag isch ernst gmeint...ich han mi nie würklich demit befasst...

[damian]

es isch obligatorisch ä chrenkekasse zha! das wird vom gsetzgeber sogar überprüeft. vermuetli machet dini eltere das no für dich i dem fall! ev. chunsch au no prämieverbilligung vom staat über, dass nüt muesch zahle, aber au i dem fall chämtisch mindestens 1 mal im jahr post über dass dini prämie fründlicherwiis vom staat zahlt worde isch... ich glaub dini eltere machet das eifach für dich und du weisches nöd...

[Herr Rossi]

@xino
findi e gueti ischtellig. öper weniger wo spitäler, döktere & co belaschtet. finds super gits no lüüt wo sich bim ne beibruch sälber e schine mached

[geosnow]

oder sägemers mal so, es wird ihn niemerd imene grabe verrotte lah. ussert es findet ihn niemerd.

[Xinobrax2]

es isch obligatorisch ä chrenkekasse zha! das wird vom gsetzgeber sogar überprüeft. vermuetli machet dini eltere das no für dich i dem fall! ev. chunsch au no prämieverbilligung vom staat über, dass nüt muesch zahle, aber au i dem fall chämtisch mindestens 1 mal im jahr post über dass dini prämie fründlicherwiis vom staat zahlt worde isch... ich glaub dini eltere machet das eifach für dich und du weisches nöd...

Ne, die zaled nix...kei Ahnig wo die Rechnige landed, ich han ja kei Meldeadresse.
Fürn Ernstfall hani e gueti Adresse wo das alles erledigt. Gnueg Geld hani au...so what?
Ich finds ja guet dass die wo e Versicherig wend au eini hend...aber obligatorisch? lol....

[damian]

du chasch ä chrankekasse nur dänn chünde, wänn du bereits ä neui chrankekasse abgschlosse häsch wo dä alte kasse bestätigt dass du bi ine versicheret bisch... es isch fast nöd möglich i de ch kei chrankekasse zha, es wird nämli bi jedem wohnortswechsel aktiv überprüeft öb du eini häsch, und en offizielle wohnort brucht mer glaubs au... oder häsch di mal vo dinere gmeind abgmolde ohni dich ame neue ort aazmelde? eigentlich gaht au das nöd ohni bsuech vo dä polizei...

fräg doch sust eifach mal dini eltere, die chönd der sicher me säge...


und s'obligatorium hät scho en sinn. mensche sind dä meinig, dass mer alles söll mache zum dä tod vo andere mensche z'verhindere. ohni kk würdet mer di ganz ziit i moralischi zwispält grate...

[Herr Rossi]

mensche sind dä meinig, dass mer alles söll mache zum dä tod vo andere mensche z'verhindere

ja ok so eifach isches de scho nid
aber ja, xino chum verzell dini gschicht mit de chrankekasse

[Jones]

viellech ischer ja e illegale...
gnue geld? ja klar... säg das mau eim wo chrebs bechunnt oder e herz OP brucht... de chasch de locker mau 100'000 oder no witus meh locker mache.
gah itz mau nid dervo us, dass du millione ufem konto hesch...

keni z'ha isch nid eifach das isch eso. ha e wächsu gmacht das jahr und die alt het bockig tah wiu sie die elektronisch bestätigung vor neue nid becho het. ha all wuche e brief becho vor alte mit dr adrohig, sie wärdi rückwirkend wieder aktiviert... natürlech isches ihre bock gsi aber nur zum zeige wie da dr finger druf ghalte wird.

wenn meh sich abmeldet (wegzug is usland oder o eifach wohnortwächsu) und sich niene meh ameldet, zahlt me aber o keni stüre etc. nur äbe... denn chöme de irgendwenn scho d'behörde verbi... und es git es büessli...

ig bi allg. versichert mit privatzuesatz bi unfall...
arztwahl hesch ja hützutags sowieso frei meh oder weniger. chasch als allg. patient ine privatklinik ineloufe und sie müesse!!! di behandle...
einzelzimmer chasch je nach spital ja o derzuebueche als allg. patient... upgrade wie im flugzüg. lol

[Herr Rossi]

wenn meh sich abmeldet (wegzug is usland oder o eifach wohnortwächsu) und sich niene meh ameldet, zahlt me aber o keni stüre etc. nur äbe... denn chöme de irgendwenn scho d'behörde verbi

wo seled die de verbi cho? die wüssed ja evtl gar nid das ide schwiiz bisch
kenne au zwöi nid regischtrierti wo sich sit jahre meh oder wenitger autonom über wasser halted.
super sach, aber wenns mal würklech medizinischi hilf bzw chirurgie etc bruched wirds hert. denn gad s theater los

da mir ide schwiiz e meh oder weniger lächerlich laschi schönwetterexekutive hend wird sich für die beide au nid vil ändere die nöchscht ziit.
üsi polizei isch ja scho mit töfflibuebe überforderet

[Jones]

da hesch natürlech rächt, aber weisch meh cha o per "zuefall" driloufe...
und wenn nid grad im ungergrund oder ir husbsetzer szene läbsch, wirds ohni agmeldet si nid ganz eifach.
aber jede het haut e anderi vorstellig vo sim läbe...

übers andere rede mer besser nid da du eh nix dervo versteisch...

[Herr Rossi]

da hesch natürlech rächt, aber weisch meh cha o per "zuefall" driloufe...
und wenn nid grad im ungergrund oder ir husbsetzer szene läbsch, wirds ohni agmeldet si nid ganz eifach.
aber jede het haut e anderi vorstellig vo sim läbe...

übers andere rede mer besser nid da du eh nix dervo versteisch...

für mich wärs au nüt, wil ich mich defür entschlosse ha nid nume für mich sälber verantwortig zträge.

und über s "andere" chamer immer rede, da ich nix vo dinere site verschtoh und du nix vo minere
es gid zwenig vo öich und das isch au guet so, zumindescht für mich

[Jones]

für mich wärs au nüt, wil ich mich defür entschlosse ha nid nume für mich sälber verantwortig zträge.

verantwortigsvolle herr dr herr rossi!

[Herr Rossi]

ja luschtig gäll
zucht und ornig

[Jones]

zuchtross macht nachwuchs... lolen

[Xinobrax2]

Mini Eltere zaled definitiv nix und bi mim Heimatsort hani mi abgmolde oni mi noimeds andersch azmelde. Das git bi Verhaftige amigs churzi Gspröch aber kei Problem. Si wend denn amigs eifach wüsse wie si mich chönd erreiche. Mitere eMail Adresse sinds bis jetzt immer zfride gsi. Usserdem hani no e gültigi ID, also nix illegal

Also wenn bi mir mal seti Chrebs diagnostiziert werde chemt ich sicher nid uf d Idee irgendwelchi Medis oder Chemo z verlange...im Gegeteil, das wär so zimlich s letscht woni würd mache. Es wird allerdings au schwirig sowas z diagnostiziere weni nie zum Arzt gange. E OP wär wider was anders...en Unfall chan ja immer passiere. Obi s Geld denn defür würd usgeh weissi nid...chunt halt uf d Situation druff a.

Ich han eh nid vor ewigs so witer z lebe. Im Moment machts Spass und ich fühl mich so zimlich frei...aber irgendwenn hani eh gnueg devo. Mal luege was denn alles uf mich zue chunt

[Jones]

voll dr husbsetzer dämfau?
nid jedermanns sache...

[geosnow]

und wenn mal dummerwiis en goof id welt stellsch?

[Xinobrax2]

Ich mach zwar mengisch recht gern tumms Zügs aber so tumm bini jetzt glich au wider nöd...

[Herr Rossi]

Im Moment machts Spass und ich fühl mich so zimlich frei...aber irgendwenn hani eh gnueg devo. Mal luege was denn alles uf mich zue chunt

xundi ischtellig, mer darf sich nüt verbiete find ich. isch chli sgliche wie mit veganer/vegetarier. die wo säged "ich würd nie" sind eifach nid agnz putzt. woher sel ich wüsse was i 5 johr isch.
de durchschnittsschwizer isch sicherheits- und kontrollsüchtig, das macht ne sehr langwilig i mine auge

@geo & xino
warum dummerwiis?

kei verantwortig übernäh oder die übliche "gründ"? (bösi wält, kei finanzielli mittel)