Aktie sind sehr guet, letscht Jahr hani en gueti Nase gha. Recht früeh gmerkt, dass di schlechte Sache nöd laufed und die guete Titel recht nöch bim Höch verchauft. Uf jede Fall hani einiges meh usegholt als ufem Sparkonto
Nur mini Roche dümpled im Moment no bi +/- 0% ume, ich hoffe das gaht denn um t Dividende no biz ufe, aber au suscht, längerfristig empfindis ämel als guete Iistigspriis, ha bi 138 en paari kauft. Genentech het es paar Sache ide Pipeline, leider laufts mit Avastin nöd grad so rosig
Zum Glück hani erscht nach dene Schlagzile kauft, au wenni nochli tüüfer het chöne debi sii, egal.
De Cheller het übrigens nöd unrecht. Ich konzentrier mich au uf CH Titel. Oisi Konzern sind grundsätzlich sehr seriös, du kennsch si, si sind relativ transparent, du bisch schnell ade Infos, du chöntsch ad GV, du kennsch dich rechtlich / finanziell einigermasse mit de Rahmebedingige vo dere Firma us, hesch kei Devise-Problem usw. usf.
Dezue chunt, dass du easy au mit CH Blue Chips chasch z.Bsp. vode Emerging Markets chasch profitiere. Nestlé, ABB, Holcim, Swatch usw. sind recht aktiv i dene Gebiet, Tendenz zuenehmend. Das macht die Grosspapis wo uusschliesslich i Schwiizer Aktie investiere möcht eigentlich total irrelevant, de SMI isch en Export-Index, genauso wie de DAX.
Um Optione mach ich übrigens en grosse Boge, es isch unglaublich komplex und solang du nöd gnueg Kapital hesch zum Short gah, wirds vermuetlich uf langi Frischt eher es Verluschtgschäft sii. Usser mer isch würklich grad inere unufhaltsame Boom-Phase oder du bisch en Insider bzw. informiersch dich unglaublich guet.
Logisch ghörsch immer wider vo Lüüt wo irgendwie ihre Iisatz ver15facht hend, aber genauso oft hanis miterlebt, dass eine alles verzockt, das ghörsch denn natürli nirgends.
Im moment bini übrigens sehr zrugghaltend, ich han nurno t Roche Titel im Depot. Isch eigentlich es reins Buuchgfühl, aber wennmer au t Quartalszahle vode letschte 2,3 Quartal betrachtet wirds schwierig die Erwartige z toppe. Aber ebe, chan mi au grad so guet tüüsche
Uf längeri Frischt gsehni im Moment Aktie aber sehr positiv, da sie grundsätzlich en Inflationsschutz büütet und ich irgendwie devo usgahne, dass ebe genau sone Inflation bald mal uf ois zuecho wird.
