(G)zockt - (G)plapper - Frisch(G)presst

[Master(G)]

euses aller erste youtube video isch online !!

Es ist da, unser aller erstes YouTube Video! Klar ist, dass das Ganze für uns noch Neuland ist und wir erstmal die Fühler ausstrecken müssen. Es ist ein Lernprozess, bei dem wir auch auf eure Hilfe angewiesen sind. Schliesslich machen wir diese Videos für euch! Lasst also gerne einen Kommentar hier und teilt uns mit, was wir noch besser machen könnten...

check (G)zockt #1:
https://www.thegnet.org/post/g-zockt-1-halo-infinite

[kingcaid]

isch nachli harzig.

so machsch vids:

Quelle

[Master(G)]

jup, stimmt. euses aller erste video. lernprozess. darum sägi ja, kritik welcome!

[Ribit X Titan]

Ihr müsst nicht jemand nachahmen denn ihr nicht seid, authentisch sein ist immer noch am besten und von den eigenen Wurzeln an konstant aufbauen.

Das "bessere" Video finde ich nicht einmal so gut weil da ist einfach in zu kurzer Zeit zuviel los, man kommt da kaum zur Ruhe und kann wegen den vielen Schnitten kaum relaxen. Man kann auch einen anderen etwas gemächlicheren Stil haben, es muss einfach das Herz berühren.

[kingcaid]

Bevor dä Ribittler no wiiter glaubt är müässti für mich schnurrä, gahni besser is Detail.

Authentisch isch scho guet. Wänn dich für CH Dialekt entscheidsch, de sötts au verständlich sii mit Widererkennig. Tonqualiisch als würd dä Captain usm Cockpit äh druchsaag bringä. Mängisch ischs mumble jumble und so als wärs e Vortrag mit spitzbüäbischer Froid, endlich wiedermal is WWW chönä dä Fame innezhole. Fakte und all das isch imne Review nett, nur intressiert das kei Sau meh. Ihr sinds (G), ihr sind (G)aymers mit Passion. Das dörfmä ruhig au märkä. Fans für Fans, Humor/Witz (ruhig schwarz, silly oder provokativ), Charakter, dä ruhig au chli aheggä cha und bi dä Ziit bliibä und nöd als wärsch ufme Chrützschiff und dä Animator will mich vomne alo Infinite überzüügä. Känn kei erfolgriichi Reviewer, diä unwitzig wär. Ah und machäd doch no eh wiedererkennigsmerkmal drii und äh Intro.Bruucht ja kei grossartigs zsii.

Positiv isch d Videoziit, mer merkt vo waser schnurred, s isch farbig mit suubere Cuts im Video, är bringts läbändig übärä.

[Ribit X Titan]

Wenn man dasselbe macht wie "die Anderen" ist man nur einen von vielen und geht noch in direkte Konkurrenz mit dem was schon lange für sich funktioniert. Es braucht also Eigenheiten, Diversität, das was noch fehlt: Hier haben wir gar nicht so unterschiedliche Meinungen.

[LuiStyle]

Isch en guete start gsi und es recht guets review Nur die komische Videoschnitt händ mir nöd gfalle.

[JACKWHACK]

Yo

Viele dank für eure bisherige Input, ich nimm das alles sehr gern entgägä u probiere seint oder andere zverbesserä oder zübernäh!

Ja dä mit dr Mikro Tonquali isch na die grösst baustell bi mir, da bini selber nonid zfridä u probiere geng us bisi de mau die perfekte istellige gfunge ha!!

Merci allne tuusig

[Jones]

komische dialäkt!

aber z'video hani easy gfunde. grad es abo da glah!

[Alurios]

Faht guet ah, ich han paar Kritikpünkt:

1. Sound: Abmischig überforderet mi recht, es lauft durchgehend en Hintergrundmusik, denn chunnt no Game Sound und au no dr Sprecher obedruff. Ich würd das ganze uuf maximal 2 Sache reduziere, wobi wenn me öbbis uusem Game würglich so mit Sound zeige wett, unbedingt nur ds Game laufe laht Kommentarlos ohni irgendwelchi Hintergrundmusik. Das würdi im vornerein Kommentiere als iispieler oder nachträglich erkläre warum me die spezifischi Szene zeigt het. (Das hesch du ja teilwiis au gmacht!)
Ich würd vilicht au eher uuf es dynamisches Mikrofon uuswiche weg dene Zisch grüsch wo mir im Mundart eifachd zviel hend.

Ich fändi Screencaps düütlich besser als B-Roll anstatt ds Tablet and Kamera zhebe.

Und ebe gwüssi Effekt wie ds Zoome würdi viel spärlicher iisetze da es ja en Brichterstattig isch und ned e Meme.

Apropos: Han es Abo dagloh und freu mi uuf dr Content wo uns erwartet.

[Master(G)]

gueti input lüütlis! danke!

[mr.raw]

Wenn me de Pitsch in sine erschte Sändige uff StarTV tuet aaluege und in de lettschte Sändig... gwaltigi sprüng hett er gmacht!
Aller Anfang ist schwer...

[Doraemon]

Het mi jetz nid besser oder schlechter tünkt was me süsch so uf youtube fingt. Auso das isch positiv gmeint, es faut ämu nid negativ uf und isch problemlos luegbar.

Was mi speziell guet tünkt:

Schwizerdütsch (das git scho gnue persönlechi Note dri für mi Gschmack, Begründig siehe nächste Punkt)

Es konzentriert sech uf d Facts und uf ds Game und nid ufe Typ. Vili Youtuber si für mi unluegbar wüus nur drum geit sich selber i Szene ds setze. Dert geits nid ums Game sondern um d Person und sis Ego. Geit mer so ufe Sack und de muesi absteue.

Was mi het gnervt:

Die huere Zooms. I würd wenn de weniger Statik wosch im Video eher Perspektivewechslel statt Zooms iboue. Oder s eifach statisch la si und bitz weniger Typ zeige haut

Aber süsch hets mi no guet tünkt und mi het Bild & Ton OK düecht kar chame verbessere aber es isch ämu scho luegbar gsi so gägenüber angerne.

[Mastler(P)]

komische dialäkt!

ih dä tat sehr suspäkt..

[LuiStyle]

Wenn me de Pitsch in sine erschte Sändige uff StarTV tuet aaluege und in de lettschte Sändig... gwaltigi sprüng hett er gmacht!
Aller Anfang ist schwer...

Nehmed Ihn mal als Gast huere super über retro stuff rede

[JACKWHACK]

Wenn me de Pitsch in sine erschte Sändige uff StarTV tuet aaluege und in de lettschte Sändig... gwaltigi sprüng hett er gmacht!
Aller Anfang ist schwer...

Nehmed Ihn mal als Gast huere super über retro stuff rede

Meinsch de Pitsch ?

[Mastler(P)]

das wür ich au gern gseh. das wär soch richtig old school gamer fanservice.
spreched en no über post und ricardo ah, für extra pünkt.

[Master(G)]

jup, de mitm Pitsch isch en gueti idee! es retro-geplapper!

[abyss]

Wär gloub eh n o cool z 2te z moderiere. Und paar Gurke Spili reviewe, das zieht ou immer. När blöd drüber schnorre, wie dr Henry damals bim Game Pro! Dasch immer z Highlight gsi für mi. R.I.P Henry.

Süsch findi isches recht gut gmacht z Video. Has luschtig gfunde, wo immer wider abkratzt bisch im MP. Waiter so...

[Mastler(P)]

jup, de mitm Pitsch isch en gueti idee! es retro-geplapper!

- früehner da ischs no so und so gsi, gäll sascha?
- ja.



bitte denn grad da verlinke.

[Master(G)]

Wär gloub eh n o cool z 2te z moderiere.

guete input! nach eusem game of the year stream hämmer eus das genau au überleid, öppe mal zzweite dumm über es game zschnurre! ma guggn! ich hamer jetzt extra en neui webcam kauft

[JACKWHACK]

Wär gloub eh n o cool z 2te z moderiere. Und paar Gurke Spili reviewe, das zieht ou immer. När blöd drüber schnorre, wie dr Henry damals bim Game Pro! Dasch immer z Highlight gsi für mi. R.I.P Henry.

Süsch findi isches recht gut gmacht z Video. Has luschtig gfunde, wo immer wider abkratzt bisch im MP. Waiter so...

Luege mol was sich irichte loht de typ isch sicher vielbeschäftigt..

Und schön hets dr gfalle, verbesserigspotenzial isch ume u wird sicher we möglich umgsetzt!

[Master(G)]

welle typ denn?

[JACKWHACK]

welle typ denn?

Ebää dä Pitsch ? - Ke ahnig kenn dä nid

[Master(G)]

check discord. das isch en wichtigi bildigslücke! haha ich erklärs dir privat...