Paar Frage zum Musigmache/Gitarre

[Vyse]

Hoihoi,

Git glaubs nöd so vill Musiker da inne, trotzdem.

Ich will jez nümm Künschtler sondern Musiker werde und brüücht es paar Tips.

Ich bin jez glaubs doch rächt Fürschi cho uuf dä Gitarre, müesst aber all die Puzzleteili irgendwie no sinnvoll chönne
vereine und brüücht en guete Lehrer, wo mi debi understüzt und mich vor allem i miini beabsichtigti Richtig zfühere verstaht.
Kännt öpper en Lehrer, wo nöd nur virtuos spille chann, sondern au würkli begriift, was er macht?

Gits es gschiids Schwiizer Musiker/Gitarre Forum (zum Lüütlis für e Üebigsband, evtl. au zum en Üebigsruum finde)

Kännt öpper es guets Gitarre-Lädeli in Züri, wo zumne faire Priis mal miini E-Gitarre chönnt revidiere und neu iistelle (Saiteabstand zum Griffbrätt, Oktavereinheit, Halschrümmig...)?

Wie am beschte zunere Üebigsband cho? Ich känne eigentli nur e Handvoll Lüüt, wo siit ca. 10 Jahr inere Band spilled und die werdet chuum mit eme
Bandunerfahrende wälle spille (bi Metal-Factory hani scho Inserat uufgäh, bi schwermetall.ch getraui mi nöd so rächt).

[kraut]

z.b. uf bandweb.ch chasch unter "kleinanzeigen" lüt sueche. oder es git ou inserat vo bands, wo no lüt sueche.

musikläde in züri kenni leider nid. aber das sött eigetlech nid so schwierig si, geisch eifach mau i eine ine und fragsch.

warum wosch e lehrer? was si überhoupt dini ziel? was möchtisch spiele? elektrisch? akustisch? klassisch? i würd säge es lohnt sich meh, es paar gueti büecher z choufe und sälber z lehre als z gäld für e lehrer uszgä (wo sehr tür isch). aber äbe, chunnt halt geng chli uf dini ziel drufa.
aber we de z.b. theorie wosch lerne, chani dir z.b. "in vivo guitar" empfähle. isch eis vo de wenige büecher über musiktheorie, wo spezifisch uf d gitarre zuegschnitte isch.

Ich will jez nümm Künschtler sondern Musiker werde und brüücht es paar Tips.

[zwirrlibatz]

inserat www.music.ch
www.swissunderground.ch

gitarreservice www.gitarrentotal.ch

aber gäll, gaht scho chli paar jahr bis es tönt. rückschläg gitts kei, nur erlüchtige.

und mal trotzdäm wiiter du löli. bruusch ja dänn eh plattecover.

macht dä kraut musig? waswerwo?

[zwirrlibatz]

lehrer isch scho guet. für afängerfähler grad usmerze und frage kläre. sich mit erfahrne lüüt abgäh isch sgschiidscht solangs nöd ichweissalles trottel sind.

chan käne vo dine kollege paar erschti lektione gäh? üebe muesch dänn eh elei.

[kraut]

macht dä kraut musig? waswerwo?

ha früecher i verschidnige bands gspielt, am afang bini der löli gsi wo nüt het chönne u drum bini a bass. das instrument het mit aber immer me begeisteret, u bi de när o rächt guet gsi. mit de bands hets aber nie so klappet, ha immer puff gha mitem arschlochdrummer (egal i welere band, der drummer isch immer z arsch gsi.)
ha när ca. 5 jahr pouse gmacht, woni o praktisch nüt me gspielt ha (bass allei isch halt scho nid so witzig). ersch vor ca. 1 jahr hani wider agfange, aber eifach mit gitarre. bi natürlech ke bluetige afänger, ha scho früecher chli gspielt, aber me so lagerfüürmässig. itz spieli aber so richtig, wobi ig eifach für mi so chli im chämmerli songwriter-zügs mache, d.h. i tue nur uf der akustische (1x nylon, 1x stahlsaite), v.a. so fingerpicking zügs. das macht mir spass. u du?

[kraut]

lehrer isch scho guet. für afängerfähler grad usmerze und frage kläre. sich mit erfahrne lüüt abgäh isch sgschiidscht solangs nöd ichweissalles trottel sind.

wobi s halt doch meischtens so isch: gitarriste = ichweissalles trottel.

ja, am afang lohnt sich vilech e lehrer no.

[Vyse]

Ey, cool Merci

Klar wird me i jedem Gitarre Lade siis Instrumänt iigstellt becho (hoffentli), aber sueche halt Empfehlige uus eigene Erfahrig.

Gtarren Total, ah, das sind die zwei uus im Interview
http://www.drs2.ch/www/de/drs2/sendunge ... 79124.html

Zum Thema Lehrer.
Theorie und Praxis birngi mier scho siit eme Wiili sälber bi und stelle au Fortschritt fescht.
Dank dä Theorie entstönd au immer wieder mal "Aha" Erläbnis, aber ich dänke, es wär wertvoll,
wänn mal en Experte mier chli wüür uuf dFinger luege, mich uuf iigschlicheni Fähler wür uufmerksam mache und
mier dMeilestei (was zlerne isch) chönnt umschriebe, uuf em Wäg zu däre Art vo Spiel, woni möcht erlerne.

[Vyse]

aber gäll, gaht scho chli paar jahr bis es tönt. rückschläg gitts kei, nur erlüchtige.

Ich tuen mal e chliini Pause bim Male iilegge, uufhöre wirdi scho nöd.
Aber es isch au da Ziit züberdänke, was ich würkli demit will und wälle Grad ah Würklichkeitsnöchi/Fotorealismus
(und demit entsprächende Üebigsuufwand) mier dänn schlussändlich au sinnvoll erschiint.

[Vyse]

was si überhoupt dini ziel? was möchtisch spiele? elektrisch? akustisch? klassisch?

Wasi möcht, isch es Bandprojäkt imne Schoegaze/Postmetal/Postrock/meldisch-fiine-Blackmetal Stil (ähnlich wie Alcest, Agalloch...)

Und dänn am liebschte no es chliises Folk-Projäktli mit dä Klassische- und Westerngitarre mit Ummegezupfe.
Inspirierend würkt da z.B. seinte Album vo Empyrium "Where at night the wood grouse plays" oder Vàli mit "Forlatt".

[kraut]

wänn mal en Experte mier chli wüür uuf dFinger luege, mich uuf iigschlicheni Fähler wür uufmerksam mache und
mier dMeilestei (was zlerne isch) chönnt umschriebe, uuf em Wäg zu däre Art vo Spiel, woni möcht erlerne.

wäg de finger: isch sicher nid z schlechtischte, we dir dert öpper hilft. allerdings sött das scho so früeh wie müglech si, wüu wed di a dini stellig gwöhnt hesch, isches rächt schwierig, wider umzstelle. und ussertäm: so öppis wie "die richtigi" fingerstellig gits nid (ok, da würde mir itz d klassiker widerspräche, aber uf die muesch eh nid lose). gang mau uf youtube und lueg der paar gueti gitarriste a, du wirsch erstunt si, wie unmüglech, z.t. sogar verchrampft, die usgseh. aber solangs für di gäbig isch unds guet geit, ischs doch guet. sowieso: mit der "klassische" haltig wirsch bi rock oder folk sache extrem müeh ha, z.t. isches sogar unmüglech, d sache richtig z spile. und umgekehrt.

[kraut]

was si überhoupt dini ziel? was möchtisch spiele? elektrisch? akustisch? klassisch?

Inspirierend würkt da z.B. seinte Album vo Empyrium "Where at night the wood grouse plays" oder Vàli mit "Forlatt".

das mit der theorie isch halt immer sone sach. es git musiker, wo ke ahnig dervo hei, und trotzdem ungloublechi sache mit irne instrumänt chöi astelle. aber es erliechteret d sach uf jede fall.

[Vyse]

Mit "uuf dFinger luege" hani eher en prüefende Blick uuf miini Gsamtsituation im Zämmehang mit miim Instrumänt und miine Ziel gmeint.

Fingertechnik hani glaubs rächt e gueti. Die springet scho siite eme Wiili nümm unabhängig vonenand umme und schwebed nöch über dä Saite.
Ha zuestäzlich grad i miin tägliche Üebigsplan e Fingerdruck üebig uufgnoh, also dSaite nur no so fiin abezdrucke, dass en klare Ton git, aber nöd meh.

[Vyse]

inserat http://www.music.ch
http://www.swissunderground.ch

wohoo, ma schaun was passiert.

Wie häsch du eigentli ahgfange mit dä Band? Mit es paar Bekannte eifach chli was ahfah ummeschrummle oder grad mit gnueg Üebig in e chliini Band iigstige?

[kraut]

die frag isch zwar nid a mi grichtet, aber gibe glich e antwort. ha mit paar kollege mit ca. 16ni e band gründet, wobi ig eigetlech nüt ha chönne spiele, der drummer ursprünglech gitarrist isch gsi und der gitarrist vilech grad eis jahr gspielt het, v.a. um fraue z beidrucke. und der keyboarder isch diräkt us der höll cho. good times.

[zwirrlibatz]

wobi s halt doch meischtens so isch: gitarriste = ichweissalles trottel.

ja, am afang lohnt sich vilech e lehrer no.

(nöd nur aber bsunders gschämigerwiis) für gitarrischte isch de bass amigs e tüüfergleiti gitarre wo eifach ihri grundtön dopple söll. für bitz kreativeri lüüt sind's 2 grundverschiede iisetzbari instrumänt. erfahrig hett mir ziegt, dass bassischte amigs no rächt ordentlichi gitarrischte sind aber umgekehrt funzt amigs nöd ganz eso guet.

schlimmer als gitarrischte (und drummer) sind aber keyboarder und saxofonischte. wiiiiiiiite boge mache drum. sänger sind dänn nomal es kapitel für sich.

ersch vor ca. 1 jahr hani wider agfange, aber eifach mit gitarre. bi natürlech ke bluetige afänger, ha scho früecher chli gspielt, aber me so lagerfüürmässig. itz spieli aber so richtig, wobi ig eifach für mi so chli im chämmerli songwriter-zügs mache, d.h. i tue nur uf der akustische (1x nylon, 1x stahlsaite), v.a. so fingerpicking zügs. das macht mir spass. u du?

fingerpicking, mini schwächi. drbii han ich arpeggierti gitarre rächt gärn. machs halt amigs mitem pick.

ich han gspielt und ufgnoh und gmischt live und im studio mit und für Burning Chrome, Superterz, Red, Sophie Hunger, Disco Doom, Demolition Blues undundund... sit afangs jahr neui band, isch voruussichtlich im herbscht/winter parat für bühni etc.

em Vyse leg ich guete unterricht as härz wenn er will mettel gah. will mettel isch technisch so aspruchsvoll (eigetli isch mettel zu 99% technik im gägesatz zu indieschrummelshoegaze wo me uf allerlei arte "bschiisse" chan), dass er sichs ohni unterricht nur unnötig schwär miech. nöd zletscht gitts au kein grund monatelang elei a öppisem umechnüble wo eim en lehrer i zweidrü stunde zeige chan.

das mit de unkonventionelle spieltechnike vo guete und erfolgriiche musiker stimmt natürlich. es gitt technike wo eim sache erliechtere und die sött me sich zeige lah aber würkli richtig und falsch gitts nöd.

Wie häsch du eigentli ahgfange mit dä Band? Mit es paar Bekannte eifach chli was ahfah ummeschrummle oder grad mit gnueg Üebig in e chliini Band iigstige?

ich han - wie vieli - zersch e band gha und ersch dänn afange s'instrumänt lerne will i 3 wuche scho de erscht gig buecht gsi isch. nöd unwichtig isch ebe au viel frächheit.

mir händ sehr viel covers gspielt. da lernt me eh viel. lose was passiert, und wer was mache muessdörfsöll drmit de song "passiert". und überhaupt viel musig lose und drüber läse und sich befasse drmit. sich isoliere gäg "verderblichi" iiflüss halt ich für blödsinn. musig mache isch ustusch und kommunikation und lerne und entwickle mit null gränze gäg ufe.

[zwirrlibatz]

die frag isch zwar nid a mi grichtet, aber gibe glich e antwort. ha mit paar kollege mit ca. 16ni e band gründet, wobi ig eigetlech nüt ha chönne spiele, der drummer ursprünglech gitarrist isch gsi und der gitarrist vilech grad eis jahr gspielt het, v.a. um fraue z beidrucke. und der keyboarder isch diräkt us der höll cho. good times.

sehr guet. so ischs bi allne öppe.

[kraut]

keyboarder, saxofonischte, sänger

[Vyse]

Ha sGfühl, genau die Erfahrig fählt mier und jetzt id Livemusig iistige schiint mier enorm schwirig,
brüücht glaubs eifach zerscht mal en Jam-Buddy.

ersch dänn afange s'instrumänt lerne will i 3 wuche scho de erscht gig buecht gsi isch.

mega!

sich isoliere gäg "verderblichi" iiflüss halt ich für blödsinn. musig mache isch ustusch und kommunikation und lerne und entwickle mit null gränze gäg ufe.

Guet, für jede, wo Musig als gränzeloses Uusdrucksmittel betrachtet oder als e Klangcollage, wo zallerscht sowieso kei Kategorie hät, isch das glaubs eh klar.

Mit dä Coversongs mueni mal ahfah, das macht sinn und Metal innere Über-Virtuosität muess es nöd si. Für dä Ahfang wür miers scho lange i die Richtig zstüre und
dä Ahfang schiint erstuunlich eifach zsi.


Quelle

[zwirrlibatz]

aaaaaaaaaaah de hett en schreckliche gitarresound!


de equipment isch dänn au no e sach.

[kraut]

ich han - wie vieli - zersch e band gha und ersch dänn afange s'instrumänt lerne will i 3 wuche scho de erscht gig buecht gsi isch.

lol ja das kenni. i mine bands simer immer nur denn produktiv gsi, wemer gwüsst hei, so i 2 wuche heimer e gig. u nächär heimer üs geng ufglöst.

btw: bisch du öppe proffeschenel musiker?

[BrainBug]

Ich will jez nümm Künschtler sondern Musiker werde

was genau macht das fürn sinn?

[Acid]

Ich han vor e paar Täg au wiedermol en Song gschribä... jetzt muesen denn nur no machä.

[zwirrlibatz]

lol ja das kenni. i mine bands simer immer nur denn produktiv gsi, wemer gwüsst hei, so i 2 wuche heimer e gig. u nächär heimer üs geng ufglöst.

jaja immernume wele d'wiiber beiidrucke.

btw: bisch du öppe proffeschenel musiker?

mängisch.

[zwirrlibatz]

Ich han vor e paar Täg au wiedermol en Song gschribä... jetzt muesen denn nur no machä.

aber au allgemein immer wieder guet zwüsse: http://www.youtube.com/watch?v=QpB_40hYjXU
http://www.youtube.com/watch?v=OdVurJFM ... re=related

[kraut]

klassiker, immer wider guet zum luege/lose.