Poster a d'Wand mache - Rahme/Passepartouts?

[Astroboy]

Ahoi

Ir nöiie Wohnig ha ig früsch gstrichni, leicht grübbeleti Wänd.
Gärn möcht ig müglechst schön, müglechst günstig (!) und so dass me nachm Abnäh nid grad d'Wand muess nöi la mache, miner Poster ufmache. Mit Riisnegeli ischs gruusig, da die Chätschgummi-Knäuel mache Fettfläcke ar Wand und häbe nid so guet und mit Chläbi haftets nid wäg dr Wandbeschaffeheit.

Am Schönste wär natürlech e Rahme, aber wo gitts günstigi im Poster-Format? Ha mi mau chly umgluegt und niene was gfunge. S'muess ja nid e huere massive Glas/Holzrahme si. Irgenwas zums drufspanne würds ou scho tue, aber cha schlichtweg nid 30 Stutz für sone Rahme zahle, v.a. nid weni öppe 5-6 bruuche dervo.

Danke!

[putzfrau]

machsches mit bostitsch a d'wand. günschtigi rähme händs im ikea...

[chind]

merci, gnau das hanni au welle fröge, will ich will viel bildli ufhänge, ungefähr e so:

[Genfer]

Schöne rahme isch schön aber tür. Billige rahme isch billig aber ned schön. Drum wört ich hold scho ächli geld inveschtiere, vorallem wells hold alltag aluege dusch (gang devo us das du dini poschter ned in chäller hänksch). Billige rahme isch för mech en fumlige plastikrahme mit plastikglas.

Ich hänk au gern bilder uf und han zerscht au ned vel geld welle usgeh aber im nachhinein bin ich froh das ich ächli meh inveschtiert han, ussert bim arcade poschter, döt han ich ned sonen grosse rahme gfunde und han där vor ikea gno wo zwar günschtig isch aber leider schlächti qualität.

Passepartout: isch tür, gsed däfur edel us und schützt s'bild (Bild lid nid diräkt ufem Glass/Plastik und chan so "schnufe"). Muesch ide rägel einzel däzue chaufe, isch öpe 3-4 mm dick.

Rahme: han mini vom Interio, send metal und s'glas isch richtigs glas. Die händ schöne uswahl, send aber hold ächli türer. Han für mini glaubs öpe 80.- bis 100.- hämmer das stück (mit Passpartout) zahlt.
Muess aber poschters je nach dem no zueschniede damit ichs ine bring. So en rahme muesch dän aber scho guet at d'wand mache, isch mämli rächt schwer. Aber es gseht dän au edel us und sowise, so rähme häsch fürs läbe lang!